La música va tar presente nel Reguerada Fest de Candás, con siete conciertos y stand de musicasturiana.com
Del 3 al 6 de payares Candás va acoyer la primer edición del Reguerada Fest, feria d’empreses, lliteratura, música, artes visuales y escéniques y gastronomía qu’entama la Conseyería de Cultura, Política Llingüística y Turismu cola collaboración del Conceyu de Carreño, el sofitu del Ministeriu de Cultura y la coordinación del músicu y escritor Xaime Martínez. Dientro de la programación va haber espaciu pa la música’l país, con siete conciertos y la participación de musicasturiana.com con un stand nel mercáu d’empreses y na mesa redonda La empresa y l’usu del asturianu.
La Fábrica d’Ortiz y el Teatru Prendes van ser los escenarios de les actividaes rellacionaes cola música asturiana del Reguerada Fest. A les 16h del vienres 4 ábrese na Fábrica d’Ortiz el mercáu nel que van participar 15 empreses que trabayen n’asturianu y nel que musicasturiana.com va tar presente col so catálogu de CDs, vinilos y merchandising. Esti portal especializáu na música fecha en llingua asturiana y gallego-asturianu tamién va participar na mesa redonda La empresa y l’usu del asturianu, onde’l responsable del proyectu, Xicu Ariza, va compartir alderique con otros cuatro proyectos.
La música de raigañu va tener protagonismu el vienres 4 colos conciertos d’Orquesta Céltica Asturiana -a les 21h nel Teatru Prendes de Candás- y, na Fábrica d’Ortiz, el taller de baille tradicional de Pau Santirso a les 21.30h y l’actuación d’Ambás ya Ramsés a les 22.45h. Pal sábadu 5, L-R van descargar el so post-folk asturianu a les 22.30h tamién na Fábrica d’Ortiz.
Poesía y Reciella
La música pa tola familia tamién tien espaciu nesti eventu con dos conciertos: el de David Varela col so espectáculu Restolando -sábadu 5 a les 12h na Fábrica d’Ortiz- y el de Pop Piquiñín el domingu 6 a les 12h nesi mesmu espaciu. Amás, el Reguerada Fest va facer que música y poesía vaigan de la mano con dos actividaes pal sábadu 5: a les 13.30h Poesía dixital, con San Jerónimo DJ Set xunto a dellos poetes; y a les 20h l’actuación d’El Velcro, el proyectu spoken word de Pablo X. Suárez y Dudu García.
