Rodrigo Cuevas reivindica’l folclor y refuga que se ponga de moda

L’instrumentista y cantante Rodrigo Cuevas ta acabante de publicar nel últimu númberu de la revista catalana Enderrock -la revista más importante de la escena musical d’aquel país- un artículu tituláu «Que el folklore no estigui de moda», nel que fai una reivindicación encesa de la tradición, pero non como daqué inamovible y inmutable. Destaca que les músiques d’orixe tradicional y popular tán espoxigando, bebiendo de munchos otros estilos; reivindicando un papel central nes músiques populares contemporánees y, lo qu’él considera más importante, dientro del ámbitu llúdicu, la diversión y l’ociu.

Sicasí, alvierte del peligru de ponese a facer ‘música tradicional’ ensin xeitu, ensin nenguna investigación nin criteriu etnográficu, arrastraos pola moda. Según él la tradición cuenta con una imaxinería mui icónica y mui fácil de convertir nun productu pop, lo que supondría entrar nun terrén abegosu si namás interesa esta capa más superficial del folclor. Poro, ye importante escapar de la moda, ye lo peor que-y puede pasar a un arte, porque les modes lo que faen más llueu que tarde ye desapaecer. La so propuesta ye: «Deprendi a baillar, deprendi a cantar, a tocar, a escuchar, a dexar de falar tanto y escucha muncho primero; conoz el mundu de l’artesanía, escucha, dexa de comprar nel supermercáu, escucha, siéntate coles tos vecines y escucha, escucha, escucha, escucha…». Una idea esta la d’aparase y sentir lo que tienen que dicir les voces nes que ta vivu’l folclor que trescala tol artículu, reafirmándose Cuevas nello, otra vuelta, con estes palabres: «El folclor va d’escuchar más que de dicir, va más d’escribir una lletra y depués sentila n’otros llabios y reconocela y sentite bien más que de firmar autoríes y reclamales; el folclor ye más comunidá qu’individualidá».

Fai tamién un llamáu a dar visibilidá a artistes como los y les qu’apaecen nun reportaxe incluíu nesti númberu 339 d’Enderrock (que nel 2022 cumple los sos trenta años de vida) tituláu «El nou folk»; nél fálase de les propuestes nueves que se tán dando dientro d’esi ámbitu nel panorama musical catalán, con nomes como: Tarta Relena, Arnau Obiols, Joana Gomila, Sandra Monfort, Joana Darka o María Arnal i Marcel Bagés.