Arenas de Cabrales va acoyer ente’l 3 y el 11 de mayu la cuarta edición del Válgame Fest. Nel eventu va haber muncha música’l país, charres y proyecciones, una esposición de cerámica, mercáu artesanal, xuegos tradicionales y una xinta popular. Les actividaes musicales van concentrase ente’l vienres 9 y el sábadu 10 con una Nueche en Danza, música de cai y conciertos.
Luis González Fernández va abrir l’eventu a les 13h del sábadu 3 cola charra Vida y pastoreo en coplas y cantares recogidas en Arenas de Cabrales nel Atenéu Cabraliegu. Esa mesma tarde va inaugurase la esposición de cerámica a cargu de Miguel Carrascal, que va tar disponible hasta’l final del festival, y va proyectase’l documental Los últimos pastores de Samu Fuentes a les 20h.
El vienres 9, la música y el baille van entamar a les 23h cola bandina L’Andecha Turcipié y los cantares tradicionales d’Ambás y Ramsés na Nueche en Danza. Al otru día, la música tradicional va sonar na Plaza’l Castañéu con Oscarín y compañía a les 13h y Los Gascones a les 19h. La nueche del sábadu 10 van protagonizala los conciertos de Girls to the front, Guieldu y Skama la Rede. L’eventu va finar el domingu 11 cola so tradicional xina de fraternidá con paella y escenariu abiertu.
Suscríbite a les nuestres novedaes
