Los díes 17, 18 y 19 d’ochobre Morea va ser l’escenariu del FolkAyer, eventu qu’axunta conciertos, alcuentru de bandes de gaites, talleres, mercáu, gastronomía y otres actividaes. Corquiéu, Algaire, Deira, Carlos Velasco & Chino el Indio, Trebeyu, Soi Panderetera, Prau Llerón, Xurbeo, la bandina Los Trimendos y les bandes de gaites Conceyu de Xixón, La Reina’l Truébano y El Gumial van poner música’l país a esta cita que dende hai 10 años lleva los sones de raigañu a la llocalidá ayerana.
El vienres 18 a les 17.30h entama l’eventu cola apertura del Mercáu Tradicional qu’a lo llargo del fin de selmana va ufrir artesanía, xoyería, puestos de comida y actividaes pa la reciella. A les 19.30h ye’l taller de baille asturianu y a les 21h un desfile de bandes de gaites que va dir dende’l campu Morea hasta la carpa’l festival. A les 21.30h entama la Nueche en Danza coles actuaciones de Pandereteres de Trebeyu, Soi Panderetera y Algaire.
El sábadu 18 ye’l X Alcuentru de Bandes de Gaites que va arrancar con un pasucais a les 17h y va tar siguío a les 18.30h poles actuaciones de la Banda Gaites Conceyu de Xixón, la Reina’l Truébano de Navia, Prau Llerón de Mieres y Xinzo de Limia de Galicia. Tres del alcuentru actúen la bandina Los Trimendos y a les 22.30h emprima la Nueche Folk colos conciertos de la Banda Gaites El Gumial -organizadora del festival xunto col Conceyu d’Ayer-, Corquiéu y el grupu celta astur-andaluz Deira, que nesta ocasión van tar acompañaos del banjista norirlandés Ciarán Rya.
Pa rematar el FolkAyer, l’últimu día –domingu 19– va haber un desfile de Xinzo de Limia peles cais de Morea y otra actuación na carpa de Los Trimendos; a les 15h una xinta fecha pol Catering Asturcocteleros; y a les cuatro la tarde’l dúu formáu pol cantador de tonada Carlos Velasco y el guitarrista Chino El Indio va poner el ramu a esti X Alcuentru Folclóricu n’Ayer, que dende’l 2023 tien como añadío la denomación de FolkAyer.
Suscríbite a les nuestres novedaes
