El Festival Internacional de la Gaita (FIG) de Villaviciosa aporta nel añu qu’entra a la so edición númberu diecinueve y dende la Banda Gaites Villaviciosa-El Gaitero, organizadora del eventu, yá anunciaron les feches. El 3, 4, 5 y 6 de setiembre la villa maliaya va convertise na capital de la cultura de raigañu y de la gaita d’Asturies y d’otres partes del mundu.
«La idea ye caltener la estructura de programación de los caberos años, combinando la variedá y la bayura de la cultura rellacionada cola gaita«, desplica David Muñiz, ún de los responsables del festival. Pa ello van siguir trabayando por abarcar «los ámbitos nos que ta presente la gaita, tanto de la música tradicional asturiana como del restu de gaites de la península ibérica y d’Europa«.
Nesti sen van siguir buscando programar «coses novedoses: grupos que lleven gaita que nun tuvieren enantes presentes n’Asturies; tipos d’agrupaciones o artistes que tengan instrumentos que tean rellacionaos cola gaita…» espón Muñiz poniendo como exemplu les «lauddeñas de Cerdeña» que tuvieron presente n’anteriores ediciones.
D’esta manera, el FIG priende la maquinaria pa dar forma a la XIX edición d’un festival referencial nel qu’hai tamién espaciu pa charres, talleres, esposiciones, mercáu, concursos, folk, rock, asturianada… y una montonera actividaes que la formación maliaya entama a lo llargo l’añu pa da-y puxu un eventu trabayáu con munchu ciñu y dedicación.
Suscríbite a les nuestres novedaes
