Los festivales asturianos empiecen a dar pistes de lo que va ser la temporada 2026 no que cinca a la música. L’últimu n’anunciar les sos feches foi la Banda Gaites Saxum col so Xixón Folk, que se va celebrar del 5 al 7 de xunu. L’espaciu va siguir siendo’l mesmu que nes dos ediciones anteriores, el Parque fluvial de Viesques.
La organización entá nun dio más pistes de los artistes que van pasar pel so escenariu, pero van dir, adulces, faciéndolo. Nel añu 2025, participaron L’Andecha Turcipié, Trebeyu y Soi Pandereta na nueche en danza, mientres que nos conciertos tocaron Felpeyu, La Tarrancha y Rollu Folk. Amás, tamién participaron delles bandes de gaites. Pela so parte, nel añu 2024, los artistes fueron Pandereteros d’angüaño, Trebeyu, Soi panderetera, Aira da Pedra, Corquiéu y Rollu Folk. Eso sí, confirmen que «nesta tercer edición, amás de la programación musical, presentamos la segunda edición de Saxum per Asturies, un proyectu singular pensáu pa disfrutar de la tradición de manera participativa con talleres artesanales, exhibiciones d’oficios tradicionales, animación mitolóxica y música pel mercáu tradicional, que va cuntar con unos 50 puestos de productos d’artesanía y alimentación. Pa nós ye bien importante que tolo que se vienda seya 100% artesania polo qu’intentamos curiar el mercáu».
No que cinca a la parte musical, «caltenemos la nueche en danza del vienres y la nueche folk del sábadu, que va ser el día grande xuntu col Alcuentru de Bandes de Gaites Saxum pela tarde, ún de los momentos más especiales porque compsrtimos escenariu con otres agrupaciones. El domingu vamos cerrar la tercer edición con actuaciones y espectáculos pa disfrutar en familia», confirmen. Amás, mientres los trés díes, el festival va cuntar con actuaciones de bandinas tradicionales pa les sesiones de vermú, comíes y cenes, amás de puestos de comida y barraca.
Dende la dirección de la banda destaquen que «anque Saxum ye una banda nueva, tenemos una gran ilusión por apurrir el nuestru pequeñu granín d’arena al panorama musical y cultural asturianu. Por eso, Xixón Folk naz d’esi impulsu, de les ganes de devolver a la xente tol sofitu que nos dio dende que formamos la banda en marzu del 2024. Pero’l festival ye muncho más que música, ye un puntu d’alcuentru onde disfrutar de la cultura asturiana y compartir tradiciones con otres naciones celtes, como Galicia».
Semeya de portada de Lucía Garó.
Suscríbite a les nuestres novedaes
