El V Válgame Fest, que va volver celebrase n’Arenas del 2 al 10 de mayu de 2026, ta empezando a perfilar el so cartel coles primeres confirmaciones y actividaes anunciadas al traviés de les sos redes sociales. La organización del festival, impulsáu pol Grupu Folclóricu Corri-Corri yá confirmó que nel programa de conciertos figuren nomes destacaos del panorama asturianu.
Pel momentu, el Válgame Fest anunció cinco confirmaciones musicales pa la edición d’esti añu. El primer nome que s’anunció pa la nueche en danza foi’l de Llevólu’l Sumiciu, que van poner a baillar al públicu cola so propuesta electrónica. A ellos sumen la confirmación de La Xarangana, una bandina tradicional con un toque modernu, qu’entemez raigaños asturianos con una propuesta fresca, vibrante y perfecta pa baillar.
Pa la segunda xornada de música, ta garantizada tamién l’actuación de Los Gascones, una bandina con curdión, gaita, bombu, tambor (y dacuando saxofón) que fai música tradicional asturiana con un toque frescu y divertíu. Pela nueche, el festival confirma les actuaciones de 6 Riales, Corquiéu y Ochobre, presentando trabayu nuevu. D’esta manera, confórmase un percorríu musical dende la música de raigañu al punk, pasando pel folk tan característicu de Corquiéu.
El Válgame Fest, que dende’l 2022 vien xuntando música folk, rock y cultura popular nel oriente d’Asturies, vuelve con un programa que tamién va incluyir xuegos tradicionales al cargu de 6 Conceyos, mercaos d’artesanía, Nueche en Danza y una gran paellada cola bandina de casa, Los Vicentos, ente otres propuestes participatives.
Suscríbite a les nuestres novedaes
