Odón del Paganéu acaba de presentar ‘Sendes Futura’, el single que va abrir el so próximu trabayu discográficu, Tonaes ad hoc, entá en procesu de creación. La pieza muévese nun tarrén beat-pop con ecos funk-pop y funciona como versión B de la tonada “Sendes Orixe”, que’l músicu ta rematando nestos momentos.
Delles pieces del nuevu proyectu yá se pueden escuchar poles redes sociales, tantu nel canal del propiu artista como nes distintes plataformes onde ta compartiendo avances del discu. Tonaes ad hoc va tar formáu por once temes, de los cualos seis inclúin son propiu, y toos presenten lletres inédites.
Sobre’l nacimientu de “Sendes Futura”, Odón esplica que la idea parte d’una tonada propia entá ensin zarrar.“Esta pieza xurdió d’una tonada inacabada mía, que toi dando-y la forma final, pero nel procesu apaeció la posibilidá de facer esta versión más rítmica, con un aire funki que siempre tengo presente y qu’escucho muncho”, esplica. Nel apartáu vocal, l’artista tamién xuega coles influencies y la esperimentación. “Na voz, que va a dos niveles, quixe recordar a un artista que siempre me encantó, Santiago Auserón (Juan Perro), del grupu Radio Futura. Yo esperimento asina y préstame muncho”.
‘Sendes Futura’ va ser el tema encargáu d’abrir Tonaes ad hoc, un discu que tamién se va zarrar cola mesma composición, anque nuna versión bien distinta: “El trabayu va rematar col mesmu tema, pero col xeitu más pizarreru que pueda saca-y” afirma.
Suscríbite a les nuestres novedaes
