Nun suelo creyer nes casualidades, pero sí nos procesos. Esti ye unu d’esos momentos nos que’l procesu creativu tornó nuna realidá que, amás de bien fecha, vien a cubrir una necesidá. Dalgo que la música tradi y el folclor necesitaba, tanto o más como la xente d’a pie, pero como diría ciertu londinense nel sieglu XIX, vamos per partes.
Pa conocer Leirana, unu tien que querer adientrase nos vericuetos de los oríxenes de Nel Villanueva, que nun son namás los suyos, son los de tolos asturianos, fíos del paternalismu industrial, nietos del ruralismu más puru y güérfanos d’identidá cultural. Una orfandá que munchos tratamos de curar col mesmu ritual, mirando pol retrovisor ensin dexar de mirar p’alantre, tornando a la casa familiar, buscando la paz nel rural o simplemente sintiendo a los mayores, qu’anque yá taben fartos de glayar, guardaron un pocu de voz p’asoleyar el nuesu camín.
Adulces, la mocedá vamos trabayando por reconocer esi patrimoniu inmaterial, que siempres tuvo ehí, pero que nun quiximos o nun supimos ver. Como resalta’l propiu Nel, falando sobre’l so proyectu: «Trátase de poner en valor eso que ye nuestro, y que poco a poco foi escaeciéndose». Cuando vemos a Leirana enriba l’escenariu, vemos un espeyu nel que se reflexa tolo guapo de la tradición asturiana. Falo d’espeyu y non d’actuación, porque’l músicu nun quier que lu almiremos, quier que nos xunamos. Como bon profesor que ye, nos sos talleres de baille y pandereta, que percuerren dende Candamu a Balmonte, pasando per Grau y Salas, el queríu maestrín llévanos pel so repertoriu, non solo cantando y tocando, sinón esplicando l’orixe de los cantares y les melodíes, a la vez que da nome y apellíos a eses informantes, que llucharon por caltener la tradición oral asturiana y que los sos nomes s’escaecieron milenta veces, faciendo con ello un exerciciu brutal de tresmisión de conocimientos, non solo de música, melodíes o armoníes, sinon tamién de cultura y educación.
Nes sos actuaciones, como nes sos clases, nunca hai llugar pal aburrimientu, asina ye que nuna mesma actuación, suel vese al artista acompañáu pola pandereta, el curdión, la gaita o la guitarra llétrica. Como rellata’l propiu Nel: «Segun la necesidá de la composición músical». Anque la meyor compañía, que non siempre pue tener por razones de conciliación o disponibilidá, son los sos queríos Satur Vega y David Fernández. Ellí onde l’espaciu pa tocar lo fai posible, como pudimos ver les pasaes Navidaes na villa de Salas, Nel Villanueva y Satur Vega faen la so maxa.
Dalgo que diba ser l’actuación final a una primer puesta n’escena de los diferentes grupos de baille y pandereta que dirixe Villanueva, tornó nuna hora de llecciones y deprendizaxes de la mano de la humildá y el respetu polo que se fai. Los que tuviemos ellí dende l’entamu vimos los raigaños fuertes del matriarcáu asturianu nel so proyectu. Como él bien cuntaba, el nome de Leirana responde al segundu apellíu del padre del artista, buscando reconocer el so raigañu nel occidente asturianu, onde los curiaos y el fuerte carácter de les sos tíes y tíes güeles dexaron nél un posu que lu acompaña, enllenu d’humildá, xenerosidá y fuercia. Poco a poco, l’artista va dando tamién llugar a su querida güela Elvira Suárez, nacida nel pueblu de Pumarín de Cuaya. Ella ye una de les más notables informantes que se conoz nel conceyu de Grau, a ella tenemos que agradece-y la semiente que nos dexa col so nietu Nel. Como él mesmu reconoz: «Nun busco da-y al públicu lo que busca, sinon tresmitir y facer un llabor pedagóxicu al traviés d’un mensaxe personal».
Y ye que nós tenemos que decatanos de qu’agora mesmo la música tradicional asturiana ta en manos de los que nin la creen nin la destruyen, namás la tresformen. Adáptenla a un públicu que quiciás nun esperaba ver lo que se ve en Leirana porque, avezáu a otru tipu d’espéctaculos de música tradicional, quiciabes más puristes, nesta ocasión atopóse col reflexu de l’amistá como filu conductor, pa tresmitir un mensaxe que s’alloñen de lo virtuoso y llévanos al llar, a aquelles xuntaces de los nuesos vieyos, onde se buscaba pasar un bon ratu depués de les obligaciones del día, tener un ratín pa facer lo que nos presta, ensin pretensiones nin perfecciones. Simplemente’l placer de deprender y compartir. Y nun hai meyor evidencia de que vas pasalo bien, cuando en llugar de muñeires y xotes, los agarraos y les dances también garren terrén dientro del repertoriu del músicu que ta tocando. Cuando, amás la voz que canta, non solo te pon a baillar y cantar, sinon que te va enseñando por qué va sonar la percusión de la pandereta, o por qué agora ye’l momentu de facer sentir una pedalera. Ye notable tamién esi momentu, nel que te faen removete un pocu del sitiu, cuando te recuerden que lo que va sonar, tresmitiéronlu voces que yá enxamás van sentise, porque eses informantes van morriendo y hai pocos que quieran garrar el testigu. Y ye que, a vegaes, la música ye reivindicativa y tien que facer que nos reconozamos con nuestros presumicios y les nuestres carencies, too eso somos nós.
Como dixi al entamu d’esti artículu, nun creo nes casualidades y esta nun lo ye, anque’l so autor intelectual asina lo piense, esti tipu d’espectáculos ye’l resultáu de munchos años de trabayu, averándose poco a poco y cola distancia adecuada a la música tradicional asturiana. Pasando per grupos de baille, dedicándo-y tiempu y ganes dende lo más esperimental y lo más autodidacta, viaxando pela xeografía asturiana, gallega y llionesa, formando grupos como Los Dalton, pa poder tocar nes nueches en danza hasta animase a facer el grupazu que ye Pandereteros d’Anguaño. Combinando dos vides, la llaboral y la musical, que necesariamente tuvieron que ser una, el camín qu’escoyó Nel Villanueva foi’l de «ser gaiteru» como-y tresmitió’l so Celso Fernández (Praty). «Un auténticu gaiteru nun ye namás el que toca mui bien, ye’l que siempre lleva la gaita consigo, nel coche, a un viaxe, onde seya, un gaiteru como los d’enantes, que dormíen en payares nos sitios onde diben tocar si facía falta, siempres acompañaos del so instrumentu». Nel casu de Villanueva, non solo durmió en payares, viaxó a Francia, Arabia Saudí y onde fixo falta pa tresmitir la nuesa música y conectar con un públicu que si nun sabe ubicanos nel mapa, sabe cómo suena y como bailla’l nuesu folclor.
Leirana ye entós un proyectu que naz de la cenciellez implícita que solicita’l panorama musical asturianu. «Pa un músicu que ta entamando lo más intelixente yera dalgo versátil y novedosu, con un repertorio variáu de la tradición asturiana», como sorraya Villanueva. Paga la pena dicir que Leirana nun ye otra cosa, sinon tola so trayectoria enraigonada, tou esi posu encauzáu y xenerando una sinerxa que güei podemos ver nes sos actuaciones. Conexón col públicu, pedagoxía de la música tradicional asturiana y amor polo que se fai. Pa poder esfrutalu, el músicu ta en los proyectos Dinamiz-ARTj del Gobiernu d’España y Asturies, cultura en rede del Principáu. Amás, ta somorguiáu na grabación del so primer videoclip, asina que nun nos queda muncho pa poder esfrutar a Leirana al traviés de la pantalla.
Pero por recomendación personal y en pallabres del músicu, nos sos espectáculos: «hai tiempu pa escuchar, p’aprender y pa baillar», asina que na dómina de la falta de tiempu, lo meyor va ser sacar un tiempín y dir a velu, regalanos una de les sos puestes n’escena que nun ye solo de so, sinón de tolos que vamos tar ellí. Les prósimes feches del artista van ser el sábadu 18 nel albergue de Saliencia (Somiedo), el 26 d’abril nel certame de quesos artesanos de Salas (ellí tamién van tar dalgunes de les sos alumnes del taller de baille y pandereta pa facer tremar les ruxideres); y en xunu tamién vamos poder velu’l vienres 12, nos Alcuentros de Músiques Asturianes (Antiguu Insititutu de Xixón), el domingu 14 nel festival de La Fresa en Grullos (Candamu) y el 26 nes fiestes de Rivero n’Avilés.
Suscríbite a les nuestres novedaes
