Les sales de música en vivo son espacios culturales de proximidá fundamentales pa garantizar l’accesu a la cultura, favorecer el desarrollu artísticu y fortalecer la conexón col públicu. Dende esta premisa naz el Circuitu Rede de Sales, una iniciativa estatal que busca dar un nuevu impulsu al ecosistema de la música en directo. El programa, coordináu pola ACCES y en collaboración cola Dirección Xeneral d’Artes Escéniques y Música, xune a 93 sales de tol país nun proyectu común p’afalar la programación estable y la diversidá artística.
Les sales participantes van acoyer una programación contina de conciertos que va conectar escenes llocales, estatales y internacionales, apostando tanto por artistes emerxentes como por nomes yá consolidaos. L’oxetivu ye dinamizar la escena musical y reforzar el papel de les sales como motores culturales. La selección de les sales fíxose tres un procesu d’evaluación que tuvo en cuenta criterios como la calidá artística, la trayectoria, l’impactu social y la programación. Les candidatures revisóles una comisión formada por profesionales de referencia nel sector, como Armando Ruah, Marga Landete y Manuel Pinazo.
Tal y como destacó Isaac Vivero, “Rede de Sales pon en valor la importancia del circuitu de sales de conciertos pal desarrollu de la escena musical n’España”, amás de resaltar el papel del asociacionismu y la collaboración público-privada col Ministeriu de Cultura. Dende ACCES señalen que les sales de música en vivo son muncho más que espacios de programación: son llugares onde se construye escena, se impulsa’l talentu y se xenera comunidá alredor de la música.
Dientro d’esta rede estatal hai representación asturiana, con dos espacios que van formar parte activa del circuitu: Gong Galaxy Club y Tribeca Live, que se sumen asina a una iniciativa que va llevar música en directo a decenes de ciudaes nos próximos meses. La presencia d’estos dos espacios nesti circuitu supón un reconocimientu al trabayu que vienen desenvolviendo n’Asturies y abre nueves oportunidaes pa la circulación d’artistes y la conexón cola escena estatal.
Suscríbite a les nuestres novedaes
