Del xueves 21 al llunes 25 d’agostu celébrense les Fiestes de Baíña, qu’aporten al so 75 aniversariu. Na so programación, la parroquia mierense recueye actuaciones de dellos estilos musicales y otres actividaes ente les que la música n’asturianu va tener una presencia destacada al son del rock astur, l’asturianada y la música tradicional.
El sábadu 23 la bandina Los Collaínos va facer dos pases: ún a les 18h y otru a les 20h. Llueu aporta la nueche protagonizada pol rock na qu’actúen a les 22h la banda más veterana del rock astur, Dixebra, y el grupu punk-folk Skontra, xunto al tríu Sacavera.
El domingu 24 a les 19h ye’l turnu de la Femfarria Asturies Combo y el llunes 24, Día del Bollu, va actuar a les 18h el Grupu Folclóricu Prau Llerón, nel momentu del repartu del bollu. Llueu, a les 19h, hai un amuesa d’asturianada con Belén Arboleya, Alicia Villanueva, Sandra Álvarez y Adolfo Uría.
Conciertos d’orquestes, esposición, teatru, misa con gaita y tambor, xuegos tradicionales y puya’l ramu son dalgunes otres de les actividaes d’unes fiestes que podríen valir d’exemplu pa otres munches llocalidaes que tengan interés en facer un programa festivu onde la cultura de raigañu contemporánea y tradicional comparta protagonismu con orquestes y otres actividaes presentes enforma nesti tipu d’eventos.
Suscríbite a les nuestres novedaes
