Les ilustraciones van ser parte importante del trabayu nuevu de Dixebra
La entrega nueva de Dixebra -sobre la qu’hai bien d’espectación, que se pue acutar en preventa y de la que yá se pue sentir un adelantu-, tien una parte gráfica perimportante, y nella les ilustraciones ocupen un espaciu mui destacáu. ‘Ente la niebla’, qu’asina se titula’l llibru-discu col que los avilesinos vuelven a l’actualidá, tien ventidós ilustraciones (una por cada cantar más otres dos independientes) obra de cuatro renomaos dibuxantes asturianos, que les ellaboraron a costa fecha pa esta publicación.
Nesti sen, la banda quixo volver a contar col trabayu del tamién avilesín Miguel Solís Santos, conocíu nel mundu artísticu pol alcuñu de Ñuberu; foi él precisamente quien fixo les primeres ilustraciones-dibuxos que teníen a Dixebra como protagonista, ente elles el personaxe del Merucu Xusticieru qu’apaez nel primer discu del grupu, amás de caricatures de los miembros de la banda, pegatines y carteles de conciertos.
El reconocíu dibuxante de Blimea Alfonso Zapico, quien llogró’l Premio Nacional de Cómic nel añu 2012 y autor de la obra ‘La balada del norte’ sobre la Revolución d’Ochobre de 1934, participa con delles ilustraciones que tienen a la mina de La Camocha, les muyeres d’Ike (a quien Dixebra dedica ún de los cantares del discu) o los vecinos del pueblu de Tiraña (Llaviana) fusilaos en 1938 como protagonistes.
El componente de Felpeyu y dibuxante xixonés Ruma barbero, ganador en tres ocasiones del Premiu ‘Alfonso Iglesias’ de Cómic de la Conseyería de Cultura, ta presente tamién col so característicu estilu.
A estos tres nomes hai qu’axuntar, por último, el de Nieves González, una de les ilustradores asturianes que más sonadía ta algamando dende hai yá un tiempu; orixinaria de Porrúa (Llanes) tien un estilu mui definíu y identificable que combina amañosamente col llabor de Dixebra.
A esta estaya ilustrativa hai qu’amestar otres como la fotográfica o la lliteraria (con aportaciones de periodistes, historiadores o escritores), amás de la estrictamente musical, que faen d”Ente la niebla’ un trabayu escepcional y percompletu, convirtiéndolu nuna obra mui orixinal y singular nel panorama asturianu.
