La Tarrancha llanza “Tiempu de sidra y roses” el 6 d’abril
Yá hai fecha pa poder sentir el nuevu cantar que va llanzar La Tarrancha. El miércoles 6 d’abril el grupu de mecigayu-ska va publicar “Tiempu de sidra y roses“, single que va tar disponible en toles plataformes dixitales y que la xente más tarranchera yá pue dir añadiéndolu a les sos llistes de reproducción pa sentilu en cuantes asoleye.
Musicalmente «ye un tema baillable, pegadizu, con fuercia y contundencia y con un estribillu bastante pegañosu». El ritmu márcalu un punk-folk xenéricu «ensin nenguna procedencia nin pretensión local en cuantes a les raíces d’esi folk» -esclaria Valdés- y nél destaquen l’acurdión, la incorporación de xiblates y la mandolina que mete Nico Braña de Vodoo Grass, al que llamaron pa collaborar con un resultáu «bien guapu».
Los tiempos pelos que tamos pasando van tar mui presentes nuna lletra que’l vocalista de La Tarrancha califica de «murnia, cruda anque tamién con una miguina d’esperanza». «Trata de qu’esti mundu va a la sinrazón, vamos cuesta abaxo ensin frenos y hai que volver a poner los pies na tierra y recuerda que los tiempos pasaos son tiempos pasaos, pero hubo dalgún momentín pequeñu de la historia nos qu’hubo díes de sidra y roses y hai que recuperar esos díes d’una mayor conciencia social de la que tenemos agora».
Xira de branu
La publicación de “Tiempu de sidra y roses” va servir pa calentar la primer fecha de la xira nueva del grupu, la del 8 d’abril nel Festival Internacional de la Cerveza de Llangréu (FICAL) y a la que van siguir otres confirmaes nel Sol Celta d’Avilés -6 de mayu-, en Vil.lablino -20 de mayu-, nel Maizu Rock d’Intriagu -2 de xunetu-, n’El Puntal de Villaviciosa -9 xunetu-, na llocalidá lucense de Barreiros -23 de xunetu-, en Torrelavega -20 d’agostu-, y na Noite Celta de Porcía del 27 d’agostu.
