La Benéfica de Piloña organiza del 10 al 12 d’abril la segunda edición de Per Caleyes y Senderos, unes xornaes culturales centraes nes formes de facer cultura dende’l mediu rural. Esti alcuentru propón un espaciu de reflexón, intercambiu y convivencia ente axentes culturales, creadores/es y proyectos que desenvuelven el so trabayu en contestos rurales, poniendo en valor práctiques asitiaes, saberes llocales y modelos culturales que nacen dende’l territoriu.
A lo llargo de trés díes, el programa combina distintos formatos pa favorecer tanto’l pensamientu colectivu como l’alcuentru informal. Ente les actividaes previstes inclúinse conversaciones y meses de diálogu con proyectos convidaos, dinámiques participatives orientaes al conocimientu mutuu ente les persones asistentes, y espacios compartíos que continúen en momentos como les comides o percorríos pela contorna.
El Festival Jazz de Tolivia (Llaviana), el Prestoso Fest de Cangas y los CSA L’Aviru de Morcín y L’Apiaderu de Nava, son dalgunes iniciatives venceyaes a la música que van participar nes meses redondes. A elles súmense otros proyectos culturales, amás de cualquier persona artista, artesana, profesional de la cultura, dinamizadora o interesada no cultural que desenvuelva l’actividá nel ámbitu rural y que s’inscriba nestes xornaes. L’eventu forma parte del proyectu “Xornaes Per Caleyes y Senderos, Segunda Edición”, financiáu pol Ministeriu de Cultura y Deporte nel marcu de les Ayudes pa l’Acción y Promoción Cultural 2025.
Suscríbite a les nuestres novedaes
