La Conseyería de Cultura, Política Llingüística y Deporte ta acabante d’anunciar dos iniciatives nueves pa da-y puxu a la cultura tradicional: la creación y primer convocatoria de los Premios Patrimoniu Cultural d’Asturies y una nueva llinia de subvenciones pa proyectos de difusión de la cultura tradicional destinada a asociaciones ensin porgüeyu económicu y entidaes llocales y dotada con 200.000 euros.
Los Premios Patrimoniu Cultural d’Asturies quieren reconocer a persones y entidaes que desendolcaren un llabor destacáu na defensa, conservación, estudiu, recuperación o difusión del patrimoniu cultural. La primer convocatoria va cuntar con diez estayes de les que munches tán venceyaes a la música de raigañu: recuperación y tresmisión de patrimoniu cultural; patrimoniu etnográficu; memoria oral; dances y bailles d’Asturies; tradiciones asturianes; cultura asturiana de la gaita; cultura quesera; cultura sidrera; cultura minera; y conocimientos y saberes venceyaos a la cultura asturiana.
Estos gallardones, tán dotaos con 1.000 euros por categoría, y pueden reconocer mesmo trayectories como actuaciones concretes d’especial relevancia. Les candidatures pueden ser promovíes por entidaes, asociaciones y instituciones académiques, científiques o culturales venceyaes a la defensa del patrimoniu y tamién por particulares, nesti casu últimu, col aval de diez firmes.
Los premios tienen calter añal y van entregase cada añu a entamos d’avientu, al rodiu d’una fecha especial: el 4 d’avientu, aniversariu de la declaración de la cultura sidrera como patrimoniu cultural inmaterial pola Unesco y festividá de Sánta Bárbara, patrona de la minería.
La segunda de les novedaes ye la convocatoria de subvenciones pa proyectos de cultura tradicional, que va cuntar con 200.000 euros y que ta empobinada pa entidaes llocales y pa organismos ensin ánimu de llucru. Los proyectos han contribuyir al caltenimientu y espardimientu de la cultura tradicional y usar como llingua vehicular l’asturianu o’l gallego-asturianu; idiomes nos que siempre s’espresó la cultura de raigañu.
Asina ye como esta convocatoria va sofitar iniciatives venceyaes al folclor -incluyendo la música, el baille y la lliteratura oral-; los oficios y l’artesanía; los deportes y xuegos tradicionales; la gastronomía; l’arquitectura y la construcción tradicional; la indumentaria; y les festividaes y mazcaraes.
Estes dos nueves iniciatives amplíen una llinia de trabayu que Cultura foi desenvolviendo en dellos ámbitos del patrimoniu material y inmaterial y a la qu’esti añu destina 2,3 millones. Ente les iniciatives más lligaes a la música de raigañu destaquen los procedimientos p’avanzar na declaración de Bien d’Interés Cultural (BIC) a la Cultura Asturiana de la Gaita; a la Danza n’Asturies; y a les Mazcaraes d’Iviernu; amás de les ayudes a les iniciatives de difusión, estudiu y puesta en valir del patrimoniu material y inmaterial, con una dotación de 140.000 euros.
Destaquen tamién les subvenciones a les escueles de música tradicional, con un presupuestu de 200.000 euros, amás de la organización de les Xornaes de la Música Tradicional Asturiana, qu’axuntaron en Llaboral Ciudá de la Cultura a más de 260 intérpretes, docentes, alumnáu y miembros de bandes de gaites. La cultura tradicional tamién ta presente dientro del circuitu Asturies, Cultura en Rede, que tien una llinia propia pa proyectos de divulgación de la historia, el patrimoniu y la cultura popular.
Ente otres accionesdesendolcaes alcuéntrase l’acoyida, por vez primera, del Festival Internacional de la Mázcara Ibérica, nel que participaron 600 persones y más de trenta grupos de dellos países d’Europa; la collaboración col Festival Intercélticu de Lorient, na que se sumó a la delegación asturiana a los ganadores del Premiu Obdulia Álvarez «La Busdonga» d’Asturianada o’l convite a Asturies pa que seya’l país que protagonice los Showcase Scotland 2027 del festival Celtic Connections de Glasgow.
«La cultura tradicional ye pegoyu de la nuestra identidá, y el nuestru oxetivu ye que disponga d’instrumentos de protección, pero tamién de recursos pa tresmitise, estudiase, divulgase, renovase y llegar a xeneraciones nueves», sorrayó en rueda de prensa Vanessa Gutiérrez, conseyera de Cultura, Política Llingüística y Deporte, quien añadió que dende la so conseyería tán «construyendo una política qu’actúa en toles árees: investigar y documentar, protexer, restaurar, enseñar, crear, programar y llevar la nuestra cultura fuera d’Asturies. La tradición consérvase precisamente cuando tien comunidá, tresmisión y futuru», concluyó.
Suscríbite a les nuestres novedaes
