La tarde del 19 de setiembre, mientres delantre la catedral de Uviéu cantábase al respetu y la tolerancia, estrenábase n’otru templu, el de la cultura, La Benéfica de Piloña, el proyectu Voblanaes, con un conciertu cargáu d’emoción, d’esos que namás puen enllenate’l corazón.
Asturies ye una tierra coral por escelencia; dende les habaneres de la mariña hasta les agrupaciones mineres de les cuenques, el país cantó históricamente en comunidá y tien abondos motivos pa siguir faciéndolo. Sicasí, y por desgracia, nun ye pa nada común atopar voces tan moces enraigonaes en proyectos tan comprometíos cola música asturiana como’l encabezáu por Sofía Nevado.
Voblanaes entamó’l conciertu cantando a esta tierra polifónica con dellos popurrís de clásicos de la música coral, munchos d’ellos incluyíos nel llibru Antología Coral Asturiana – Músicas del XXI para el XXI, espublizáu en 2024. Nel averamientu a estos clásicos destacó especialmente la versión del propiu coru de “Tres hojitas madre”. Mientres la interpretaben, les voces moviéronse llibremente pel espaciu, una técnica habitual p’adquirir conciencia de conxuntu, ameyorar la resonancia vocal y favorecer una mayor relaxación corporal. El resultáu foi una sonoridá envolvente y nebulosa, en constante tresformación, que captó l’atención del públicu y favoreció la so inmersión na esperiencia sonora que taba por venir.
El resultáu foi una sonoridá envolvente y nebulosa, en constante tresformación, que captó l’atención del públicu y favoreció la so inmersión na esperiencia sonora que taba por venir.
Acompañaos nes percusiones por Diego C. Camiña, los componentes de l’agrupación, na so faceta más performática, cantaron a la memoria de la inmigración a partir de delles cartes d’amor dende l’exiliu, retayos de la historia social d’Asturies que sirvieron d’introducción al arreglu de Javier Blanco de la habanera “La fonda de Lola”, compuesta por Héctor Braga. Nella cobraron especial protagonismu les intervenciones de les solistes, qu’apurrieron un especial relieve espresivu al conxuntu.
Ensin duldes, ún de los temes más aplaudíos del eventu foi “Unos siempre dan vueltes”, composición de Fernando Valle Roso sobre’l poema d’Anna Ajmatova traducíu al asturianu por Ismael Arias. Gracies, en parte, al sofitu armónicu al pianu de Noelia García, el coru demostró nesti canciu la so versatilidá estilística y riqueza vocal, ensin escaecer la so versión más desenfadada, que fizo cantar al públicu del teatru piloñés. Esta versión nun foi la única del espectáculu venceyada a compositores contemporáneos de música asturiana, qu’incluyó repertoriu de grupos como Muyeres, Guieldu o Vero Rubio, reconociendo esta última a la fin del conciertu nes sos redes sociales la fuercia emotiva y el bon facer destilaos nesti estrenu.
«Ensin duldes, ún de los temes más aplaudíos del eventu foi “Unos siempre dan vueltes”, composición de Fernando Valle Roso sobre’l poema d’Anna Ajmatova traducíu al asturianu por Ismael Arias. Gracies, en parte, al sofitu armónicu al pianu de Noelia García, el coru demostró en esti canciu la so versatilidá estilística y riqueza vocal, ensin dexar de llau la so versión más desenfadada, que fixo cantar al públicu del teatru piloñés»
L’espectáculu atopó tamién un momentu pal agradecimientu, con más d’una docena de menciones a quienes, d’una manera o otra, contribuyeron a facer posible’l proyectu. Ente elles, les persones que participaron na campaña de micromecenalgu o los illustradores que collaboraron na iniciativa, amás de Llucía Miravalles, artesana al frente de Ringo Rango y creadora del xilecu que distingue y va distinguir l’uniforme coral.
Na recta final del conciertu, Voblanaes cantó pal baille con una versión coral de la “Xota d’El Corralín”, pa la que tuvieron acompañaos por dellos representantes del Colectivu de Baille y Música Tradicional L’Enguedeyu. Cantos pal baille que s’entemecieron una vegada más cola memoria, nesti casu cola del pasáu hulleru de Llangréu, n’ún de los temes más conmovedores del espectáculu: l’arreglu de Sofía Nevado “Danza y mina”. Ún de los últimos temes, pal que Voblanaes tuvo acompañáu polos (entá más mozos) componentes del Coru Voces Blancas del Nalón, y que remataría nuna versión de “Nel pozu María Luisa” que fadría llorar a bona parte la platea.
Voblanaes enllenó La Benéfica d’emoción, colectividá y cercanía, recordándonos que n’Asturies queden entá munches razones pa siguir cantando: pa facer memoria, pa danos tira, pa curianos y dexanos curiar, pa ser más cuando cantamos xuntos y, en definitiva, como bien señalaba la so directora, pa imaxinar daqué nuevo nun mundu que cada vez se nos amuesa más difícil.
Voblanaes enllenó La Benéfica d’emoción, colectividá y cercanía, recordándonos que n’Asturies entá queden munches razones pa siguir cantando: pa facer memoria, pa danos tira, pa cuidanos y dexanos cuidar, pa ser más cuando cantamos xuntos y, en definitiva, como bien señalaba la so directora, pa imaxinar daqué nuevo nun mundu que cada vez se nos amuesa más difícil.
Semeyes Nura Granado
Suscríbite a les nuestres novedaes
