MIM (Mujeres de la Industria de la Música) va presentar el so estudiu «Cartografía», una investigación centrada na situación de les muyeres y les disidencies de xéneru na industria musical a nivel estatal. La cita va ser el 5 de payares nel Espaciu Cultural Puru Remangu, en Xixón (Cai Llibertá, 14), y va sirvir pa treslladar al contestu asturianu les cuestiones que plantea l’informe y xenerar un espaciu de reflexón colectiva sobre les desigualdaes que persisten nel sector.
La presentación va cuntar con Lara Alcázar, vocal de la xunta directiva de MIM y xefa de campañes en [PIAS], y Sandra Sienra, xestora de proyectos culturales y DJ. Darréu, dambes van participar nun alderique abiertu que pretende dir más allá de la esposición de datos y dar voz a les persones que formen parte del texíu musical y cultural asturianu.
La propuesta busca poner en común esperiencies profesionales, analizar les dificultaes que siguen atopando les muyeres y les disidencies de xéneru y identificar posibles víes d’actuación p’avanzar hacia un modelu d’industria más igualitariu. La intención ye que’l diálogu sirva tamién pa reconocer les problemátiques propies del territoriu y pensar en soluciones que puedan construyise dende’l propiu sector.
Con esta convocatoria, MIM abre un espaciu de participación nel que les persones venceyaes a la música y la cultura van poder compartir les sos vivencies y propuestes, poniendo l’acentu na necesidá d’implicar al conxuntu de la industria na tresformación de les sos dinámiques. L’actividá va entamar a les 19.30 hores y cuenta cola collaboración de músicasturiana.com y Puru Remangu.
Suscríbite a les nuestres novedaes
