Va 10 años que nació l’asociación MIM (Mujeres de la Industria Musical), una entidá que trabaya pa valtar la brecha de xéneru na industria musical. Esti sábadu 17 de xineru a les 11.30h el llocal xixonés Les Cigarreres va acoyer la primer actividá n’Asturies d’esta entidá, una «Reunión Territorial», que ta plantegada como un conceyu abiertu pa socies y non socies nel que se va «presentar el trabayu de l’asociación y afitar una base de participación estable nel territoriu», como desplica Lara Alcázar Miranda, vocal de MIM y una de les responsables de la iniciativa.
«Escoyimos Xixón pola so relevancia cultural y musical dientro d’Asturies y pola presencia de profesionales interesaes en texer rede«, comenta Alcázar Miranda sobre la que va ser la primer actividá de MIN en tol norte de la península ibérica porque, como sorraya, «ye importante que nun se centren les actividades y les socies namás en dos o tres comunidaes autonomes sinón que represente los intereses de toles profesionales del Estáu«.
La cita ta marcada tamién poles crítiques qu’hubo a los actos del 30 aniversariu de la reapertura del Teatru Xovellanos -y que MIM denunció a traviés d’un comunicáu– o la escasísima presencia femenina qu’hubo va poco nes Xornaes de la Música Tradicional -daqué denunciao en publicaciones de redes sociales y grupos de whatsapp-. Nesti sen, Lara A. Miranda camienta que «la brecha de xéneru n’Asturies reflexa una situación asemeyada a la d’otros territorios: menos presencia de muyeres nos espacios de decisión, nos cartelos y nos roles técnicos«, a lo qu’añade qu’una particularidá d’Asturies compartida «munches vegaes» con otros territorios ye «falta de datos y visibilización, lo que fai tovía más necesario’l trabayu colectivu y organizáu».
«Trabayamos pola igualdá de xéneru nel sector, defendiendo los derechos de les profesionales y fomentando una industria más xusta, diversa y equitativa. Sobre manera a traviés de programes educativos, beques, iniciatives de ciclos y conferencies, talleres y informes qu’ayuden a poner datos y cifres oxetives a la situación de les muyeres nesti sector», desplica esta vocal asturiana de MIN.
Nesti sen, Alcázar Miranda destaca acciones d’incidencia política y social, como estudios de xéneru de la industria; alcuentros profesionales como’l congresu La Ola que No Censa, o’l foru Inspira, qu’axunta a muyeres d’España y Latinoamérica; espacios de formación y creación de redes; un llabor de visibilización del trabayu de les muyeres na música -como’l d’esti directoriu-; programes de beques como GENERADORA; amás de la collaboración con entidaes d’educación especializaes «p’apoyar la presencia y formación de les muyeres na producción musical, especialmente n’ámbitos como la música electrónica y urbana».
«La idea ye qu’haiga más socies y sientan que MIM ye’l su espaciu tamién», conclúi Lara Alcázar Miranda animando a toles muyeres interesaes a participar nel conceyu abiertu d’esti sábadu en Xixón y asina siguir emburriando hacia la igualdá na industria musical.
Suscríbite a les nuestres novedaes
