Los díes 29 y 30 de marzu va celebrase la primer edición del Festival Llar, eventu nel que la música folk va ser la protagonista y nel que va haber espaciu tanto pa formaciones emerxentes como pa dalgunos de los nomes más reconocíos de la escena tradicional d’Asturies. L’escenariu principal va ser la Escuela de Música Tradicional Llacín (Llanes) y la Cai Mayor de Vibañu, espardiendo la música d’esta manera per delles poblaciones del conceyu de Llanes.
El primer de los conciertos va ser el vienres 29 na EMT de Llacín a les 18.30h. Nél van actuar Draque, tríu de la nueva xeneración folk, qu’entemez la mocedá y el bon facer de Julio Rodríguez -buzuki-, Celia Nieto -vigulín- y Celia Corrales -voz-, con una perspectiva fresca de los sones tradicionales; y Llau, formación qu’axunta veteranos de la escena en curtíos en grupos como Corquieu, Felpeyu y N’Arba: Dani Álvarez a la flauta, la gaita y la percusión, Lisardo Prieto al violín y Luis Nicolás a la guitarra acústica.
Estes dos actuaciones van tener un aforu de 100 persones (con reserva d’entrada) y son de baldre. Amás, esti eventu va servir tamién como sesión de grabación en directo pa estos dos grupos, qu’hasta agora nun tienen nengún material grabáu asoleyáu.
Llan de Cubel y Deira
Per otru llau el sábadu 30 dende les 21.30h la cai Mayor de Vibañu va acoyer les actuaciones de Llan de Cubel y Deira. La primera, ye la formación más pernomada del folk celta asturianu, mentanto que la segunda ye un tríu astur-andaluz que ta consideráu ún de los grupos más prometedores de la música celta d’anguaño.
Tres l’éxitu que tuvo’l conciertu de Martin Hayes celebráu el pasáu 27 d’avientu y del que s’escosaron les entraes en tiempu récord, Llar y el Conceyu Llanes decidieron desendolcar una collaboración conxunta p’apoyar la música tradicional asturiana pel oriente’l país. Esti festival representa un pasu hacia esi oxetivu, ufriendo a artistes consagraos y emerxentes «un espaciu p’amosar el so talentu y constribuyir al paisaxe sonoru n’evolución del folk asturianu».
Suscríbite a les nuestres novedaes
