El cantante reggae Fred Warrior publica’l videoclip “Pallabres n’asturianu”

La llingua asturiana va espardiéndose adulces per sones nuevos y una amuesa d’ello ye “Pallabres n’asturianu“, el tema y videoclip que’l cantante xixonés de reggae Fred Warrior ta acabante d’asoleyar. Esta pieza ye la primer referencia de Ximiélgalo Records, sellu discográficu nuevu que naz a iniciativa del colectivu radiofónicu y cultural Ximiélgalo, axente dinamizador de los soníos xamaicanos pel país qu’usa siempre l’asturianu como llingua d’espresión.

«Esti cantar ye un dubplate baxo’l ritmu entituláu “North Breeze Riddim”, obra del productor asturianu Huergostaylah», despliquen dende Ximiégalo Records. N’él, «el cantante Fred Warrior, miembru d’Allanai Sound System, anímase a soltar la so llírica en llingua asturiana, idioma qu’afala a defender». «Roots modernu con toques dixitales pa pidir la oficialidá de les llingües d’Asturies y cultivar el reggae na nuesa llingua llariega», añade la discofráfica sobre esta pieza qu’asoleya acompañada d’un videoclip fechu pol documentalista Alejandro Palacios.

Nun ye esta la primer incursión que l’idioma autóctonu del país fai dientro de los soníos xamaicanos. Proyectos d’hai más d’una década como Chalaneru Sound o Soncai System yá foron pioneros en facer reggae n’asturianu, amás d’otres bandes de rock astur o folk que tuvieron influencies d’esti son nos sos cantares como Dixebra, Skama la Rede, La Col.lá Propinde o Fala Non Caduca. Con esti llanzamientu nuevu, Fred Warrior y Ximiélgalo Records siguen percorriendo’l camín del reggae astur.

Dexa un comentariu

X