Llevólu’l Sumiciu, 6 Riales, Caldo y Os Rabizos y agrupaciones folclóriques actúen en San Mateo
El viernes 15 de setiembre entamaron les fiestes de San Mateo n’Uviéu, que siguen col so modelu nuevu nel que nun hai chiringuitos nin conciertos de baldre na Plaza La Catedral. Sicasí la música n’asturianu en vivo sí que va tener daqué de presencia tanto nes programaciones del Ayuntamientu d’Uviéu de Folclore en la calle y Otras músicas, como na de la plataforma Fiestes Populares. Ente’l xueves 21 y el domingu 24 actúen Llevólu’l Sumiciu, 6 Riales y les agrupaciones folclóriques banda de gaites Centro Asturiano y Carbayón, Nocéu, Xuno, Filandón, Fitoria, La Inmaculada y Trasgu -amás de la BG La Laguna del Torollu y Xárcara y La Hedra, que yá actuaron esti fin de selmana-. Amás, Caldo y Os Rabizos y Xeitu desfilen nel Día d’América.
El dúu d’electrónica de raigañu Llevólu’l Sumiciu va actuar dos vegaes: el xueves 21 a les 21h na Plaza del Paragües -dientro de la programación Otras Músicas– y el vienres 22 a les 22.30h na Plaza Folixa dientro del programa Fiestes Populares, plataforma crítica col modelu nuevu de San Mateo y qu’entama actividaes alternatives con DJs, actuaciones en directo, charres, teatru, mercaos y más actividaes. Tamién les pandereteres 6 Riales actúen nesti mesmu espaciu, el xueves 21 a les 20.30h.
Per otru llau, el ciclu Folclore en la calle continúa cola so programación anual y coincidiendo con San Mateo va ufrir les actuaciones de la Banda de Gaites Centro Asturiano y Grupu de baille Nocéu (xueves 21 pela mañana); l’Asociación folklórica Xuno San Claudio y Asociación de baille y danza tradicional Filandón (xueves 21 pela tarde); Banda de Gaitas Carbayón y Filandón (sábadu 23 pela mañana); y Grupu de baille tradicional de Fitoria y Asociación folklóricu cultural La Inmaculada (domingu 24 pela mañana); y Grupu folklóricu Trasgu (domingu 24 pela tarde).
Caldo y Os Rabizos y Xeitu
Por último, la bandina tradicional del Navia-Eo Caldo y Os Rabizos y el grupu de baille Xeitu van actuar, el martes 19 dende les 17h, enriba de la carroza de Gascona nel tradicional desfile del Día d’América. D’esta manera complétase la programación festiva de San Mateo que, siguiendo la mesma llinia que la Semanona de Xixón y les fiestes de San Agustín d’Avilés, tien una presencia mui reducida de música n’asturianu.
