Lucas 15 vuelve a dar un conciertu dempués de 9 años

En 2014 foi la última vez que Lucas 15 xubió a un escenariu. Cuasi una década de silenciu que va rompese dientro de tres meses. Xel Pereda va actuar en solitario con esti proyectu musical dientro d‘Encaja2, el ciclu de conciertos en formatu íntimu qu’entama’l Teatru Xovellanos de Xixón. La cita ye’l miércoles 13 d’avientu a les 20h, les entraes yá tán a la venta a un preciu de 6 euros y, según anuncien dende la organización del eventu, van sonar los cantares inéditos d’esti proyectu musical «nun formatu crudu, oscuru y primitivu».

Lucas 15 ye un proyectu musical de cultu dientro y fuera d’Asturies. Entama a dar los primeros pasos en 2006, cuando’l guitarrista Xel Pereda, de Llan de Cubel, propúnxo-y facer al cantautor Nacho Vegas un proyectu que reellaborara pieces populares asturianes en clave de rock alternativu. Asina dan forma a un discu homónimu qu’asoleyó en 2008 y qu’algamó muncha sonadía ente la crítica especializada y el públicu. Cinco años dempués, Xel Pereda anunció que taba trabayando nun segundu álbum col nome de In Memoriam, pero inda nun asoleyó. Esti conciertu nel Teatru Xovellanos va ser una oportunidá pa poder sentir estos cantares inéditos y volver a ver a Lucas 15 en directo dempués de 9 años.

Mercar el discu de Lucas 15