Llevólu’l Sumiciu y Anabel Santiago dan forma a “Muncho Quixera Tener”
Tres presentase públicamente col single de “Saldiguera”, el proyectu de música electrónica de raigañu Llevólu’l Sumiciu, asoleya un nuevu cantar. “Muncho Quixera Tener” naz de la collaboración ente esti dúu y la mítica cantadora de tonada Anabel Santiago. Amás, too ello garra más fuercia gracies al videuclip realizáu por Samuel Armas.
Asina fala Llevólu’l Sumiciu sobre esti nuevu single:
“Esti beat foi surdiendo nes tardes de confinamientu del branu pasáu. La so atmósfera densa y melancólica pidíanos completalu con voces y visuales que reforciaren esa mesma sensación. Nesta ocasión, tuvimos l’enorme privilexu de contar cola voz de Anabel Santiago y l’arte de Samuel Armas pa facer de les nueses y tresformalu nun viaxe oníricu per dellos paisaxes y versos irreemplazables de la nuesa cultura. Muncho Quixera Tener fraya’l clásicu tema d’Anabel, tornandolu nun reguetón lentu ya hipnóticu. La esperiencia complétase con un percorríu visual pel universu artísticu de Samuel”.
