El míticu grupu asturianu Los Berrones asoleyen «Fin de mes«, el primer single d’adelantu del so próximu álbum, previstu pa finales de 2025. El trabayu nuevu ta grabáu y masterizáu nos estudios ACME por Miguel Herrero y producíu y mezcláu por Pablo Martínez en OVNI Estudio.
Col so estilu inconfundible, Los Berrones regresen pa poner voz a una realidá compartida por miles de persones: la llucha eterna por estirar la paga hasta l’últimu día. Ente factures que nunca dexen de llegar, suscripciones a plataformes de streaming que se convierten en lluxu, vacaciones imposibles y bolsos afuracaos, «Fin de mes» llogra retratar con acidez y cercanía una situación universal.
El tema entemez un ritmu contaxosu con un estribillu que se graba na memoria dende la primer escucha. Una vez más, Los Berrones convierten la quexa cotidiana nun consuelu colectivu, onde la ironía y l’humor entellacien cola enerxía d’una banda que sabe conectar col so públicu xeneración tres xeneración.
Con imáxenes tan gráfiques como la comparación del dineru con un nial de viéspores, Los Berrones ponen pallabres a esa sensación d’impotencia que toos y toes reconocemos al llegar a fin de mes.
Los Berrones non solo adelanten lo que va ser el so trabayu discográficu nuevu, sinón que tamién amuesen que siguen en plena forma, actualizando la so propuesta ensin perder la esencia que los convirtió nun grupu de cultu dientro y fuera d’Asturies. La so música continúa siendo un espeyu donde rir, y al mesmu tiempu reconocese, nes pequeñes batalles de la vida diaria.
Suscríbite a les nuestres novedaes
