Ayeri entamaron les actividaes del Xiringüelu de Pravia, una de les fiestes con más sonadía del país. La edición d’esti añu caracterízase pola incorporación de la música n’asturianu na so programación, gracies al conciertu que va dar el míticu grupu de rock rural Los Berrones el vienres 7 d’agostu. Amás, la pregonera d’esti añu ye Yedra Riesgo, una persona venceyada a la música’l país nel so llabor como co-directora del Semando Fest, como comunicadora nel programa radiofónicu Héroes Ensin Nome y MUSICASTURIANA.COM, y como intérprete na agrupación Muyeres por Grau.
El pregón del Xiringüelu entama’l vienres 7 a les 20h, que va dar pasu al cantu a comuña del ‘Xiringüelu’ y del Himnu d’Asturies. Tres del repartu del bollu, a les 22h entamen los conciertos nel Parque Sabino Moutas con un primer pase nel que s’inclúi l’actuación de Los Berrones y de la Banda Música de Pravia, formación que yá acompañó a los de Tolivia en dalgún de los sos conciertos.
Los Berrones van presentar nesti conciertu de Pravia el so discu nuevu, Ta Too Podre, amás de facer un repasu a cuasi 40 años d’una trayectoria marcada por so estilu inconfundible: rock pa tolos públicos y unes lletres onde l’humor, la ironía, la realidá del mundu rural y tamién la crítica social, dan forma a los sos himnos.
Suscríbite a les nuestres novedaes
