Del 17 al 20 de xunetu L’Entregu celebra les Fiestes de La Llaguna, histórica celebración d’esta llocalidá de Samartín del Rei Aurelio que recuperó dende hai unos pocos años una comisión de fiestes nueves. Nesta edición, la música asturiana tien mayor presencia gracies a la programación de los conciertos de dos históricos de la escena: Nuberu y Los Berrones; dambos el sábadu 18 de xunetu.
L’actuación de Nuberu enmárcase dientro d’estes fiestes y al empar forma parte del actu institucional de descubrimientu de la placa del Teatru Municipal Nuberu, renomáu asina tres de que’l plenu del Ayuntamientu de Samartín del Rei Aurelio aprobara la iniciativa de la Peña Amigos de Nuberu pa da-y al teatru de la llocalidá el nome d’esti dúu míticu del Nuebu Canciu Astur. Tres del actu institucional programáu pal sábadu a les 19h, Chus Pedro y Manolo Peñayos van xubir a les 20h al mesmu escenariu nel debutaron exactamente el mesmu día d’hai 50 años.
Per otru llau, otros imprescindibles de la música asturiana, Los Berrones, actúen tamién el 18 de xunetu en L’Entregu. Dende la medianueche los de Tolivia van presentar el so trabayu nuevu, Ta Too Podre, y facer un repasu a una trayectoria con un estilu inconfundible marcáu por un rock pa tolos públicos y unes lletres onde l’humor, la ironía, la realidá del mundu rural y tamién la crítica social, dan forma a los sos cantares.
Suscríbite a les nuestres novedaes
