El sábadu 23 d’agostu ye’l 56 Descensu Folclóricu del Nalón y con él aporta una edición nueva d’El Regodón, el festival musical qu’acompaña a esta Fiesta d’Interés Turísticu Nacional. Del xueves 21 al domingu 24 va celebrase en La Pola Llaviana esti eventu qu’axunta cuatro díes de conciertos gratuitos y actividaes pa tolos públicos.
La música n’asturianu va tar presente colos conciertos de la bandina popular Los Gascones (xueves 21 a les 20h); el míticu grupu de rock rural Los Berrones (xueves 21 a les 00h); y Vicente Díaz, una de les figures más reconocíes de la música’l país que, como comenten dende la organización «con más d’una ventena de discos publicaos, supo entemer la tradición con arreglos pop que lo convirtieron nun habitual de les fiestes patronales de toa Asturies y referente ente la emigración asturiana n’América». El conciertu del enllenapraos va ser el domingu 24 a les 13.30h.
Amás d’estes actuaciones de música n’asturianu, va haber foodtrucks, pregón, xuegos infantiles, entrega de premios del descensu y los conciertos d’otros grupos de dientro y fuera d’Asturies: Grison, Manny Calavera, Blus Probes, Infames, Juanillous, Silvia Joyanes, Cassetres, A3 y DJ Faby.
Suscríbite a les nuestres novedaes
