La diáspora asturiana espardióse, fundamentalmente a finales del sieglu XIX y principios del XX, abondosamente a lo llargo del mundu, siendo los principales países d’acoyida México, Venezuela, Cuba, Arxentina o Chile. Tamién hacia otros territorios del Estáu hubo éxodu d’asturianos y asturianes que, por distintes circunstanciaes, tuvieron que colar del país.
Esta migración masiva producióse de manera avezada en países hermanos como Irlanda, Escocia o Galicia, que crearon comunidaes específiques nes tierres de llegada. Una de les característiques de toes elles foi la preservación de la so cultura llariega y l’enfotu por tresmitila a les siguientes xeneraciones. Nesa xera tuvo especial importancia la música y el folclor propiu, que se convirtieron nuna ferramienta afrechisca na tresmisión de la identidá. Asina, en Canadá o EE.XX. Surdieron asociaciones d’escoceses o irlandeses que conservaron los sos bailles y la so música, orixinado modernamente’l surdimientu de formaciones folk n’eses comunidaes.
Nel casu asturianu, hai bien d’exemplos d’agrupaciones folclóriques entamaes alredor de los centros asturianos creaos polos nuestros migrantes, una de les que más sonadía algamó foi’l Conjunto Pelayo, creáu por Manolo del Campo nel añu 1953 nel Centru Asturianu de Buenos Aires y que tovía sigue n’activo. Otra manera, diéronse tamién dellos grupos de folk contemporáneamente, casu de Fardaxu (Arxentina), Ta Fechu (Chile) o Risca l’Alba (Cataluña).
El documentu sonoru protagonista d’esta entrega hai que la enxertar nesti contestu, trátase de la maqueta de la segunda metada de los años ’90 grabada pola formación Folixa, proyectu entamáu por dellos asturianos residentes en Cataluña del que prácticamente nun hai más datos. Nella inclúinse tres pieces bien conocíes del repertoriu tradicional asturianu, con un soníu acústicu y arreglos cenciellos.
Suscríbite a les nuestres novedaes
