El próximu sábadu 4 de xunetu Martimporra va acoyer la trenta edición de la Fiesta de la Oficialidá de la Llingua Asturiana, eventu que tolos años comemora la histórica declaración d’oficialidá aprobada por Bimenes en 1997, convirtiéndose asina nel primer conceyu en dar esti pasu en defensa del asturianu. Esti añu Los Berrones y Xiranda Brass Band toquen nos conciertos de la tarde-nueche y el Grupu Folklóricu Los Yerbatos, Los Sidros y pauliteiros qu’aporten dende Miranda de l Douro (Portugal) actúen pela mañana.
La programación va entamar a les 12.30h na Plaza de Miranda de l Douro, onde van tener llugar les intervenciones institucionales que van dar pasu, a les 12.45h, al pregón que va poner la periodista Sonia Fidalgo. Darréu ye la Danza de la Oficialidá (13.15h) y un pasucáis (13.30h) nel que participen Los Sidros, el Grupu Folklóricu Los Yerbatos y pauleiteiros mirandeses. Estos últimos son homes danzantes que faen bailles tradicionales y aporten dende Miranda de l Douro, llocalidá portuguesa hermanada con Bimenes onde se fala una variante del astur-lleonés qu’ellí ye llingua oficial.
L’actividá treslládase dempués al Prau del Palaciu del Marqués de Casa Estrada, onde a les 14h va haber baille tradicional y, media hora más tarde, la Xira Popular, na qu’anque haiga carpa y chigre, cualquier persona pue llevar la so propia comida pa compartir col vecindariu esta xornada festiva y reivindicativa.
A les cuatro la tarde la música va siguir de la mano de Xiranda Brass Band, formación na que componentes de la Banda Gaites Xiranda fai un repertoriu arriquecíu polos vientos metales propios de les brass band. A les 21h hai cena nel prau de la fiesta y a les once la nueche actúen Los Berrones, dando aniciu a la xira qu’acompaña a Ta too podre, el discu nuevu d’esta mítica formación d’agro-rock.
Con esta trenta edición Fiesta de la Oficialidá de la Llingua Asturiana, Bimenes sigue celebrando con música asturiana y cultura de raigañu el so compromisu institucional cola reivindicación de la oficialidá de del asturianu.
Suscríbite a les nuestres novedaes
