La música asturiana ta espardiéndose cada vegada per siendes más novedoses y estos díes l’agrupación coral Voces Blancas del Nalón presentó un ambiciosu proyectu enmarcáu nesti dinamismu. Trátase de Voblanaes, una iniciativa collaborativa cola que la estaya xuvenil d’esta formación versiona cantares tradicionales asturianos y otros actuales de Vero Rubio, Guieldu, Muyeres, Fernando Valle Roso, Héctor Braga y Elisabeth Montequín (6 Riales). A esto súmen-y collaboraciones con varios artistes gráficos. El proyectu estrénase en setiembre en La Benéfica de Piloña y va viaxar a Viena (Austria) en payares, hasta’l prestixosu 12th International festival of choirs and orchestras. Pa facer realidá too esto, ponen en marcha una campaña de micromecenalgu.
«Nun queremos namás interpretar arreglos y composiciones ayenes. Buscamos crear y collaborar y facer del nuestru trabayu musical daqué que nos venceye con otros artistes presentes na actualidá musical d’Asturies. Varios músicos cediéronnos ún de los sos cantares p’adaptalu y interpretalu acordies a les particularidaes de l’agrupación coral«, despliquen dende Voblanaes nel testu de presentación del crowdfunding. Amás escoyeron pieces mítiques de música tradicional pa «completar un repertoriu inéditu y especial«, que lleva a Voces Blancas del Nalón, per primer vegada, a trabayar cola música de raigañu d’ayeri y güei.
Otru de los pegoyos del proyectu son les artes plástiques, y asina ye como les y los artistes Isabel Muñoz, Istrice Ilustra, Sergio Dosal, Hugo Priede, Celia Pandiella, Mario Hidalgo, María Ortiz, Nievesita, Bruno Galán y Alfonso Zapico van poner color a munches de les recompenses de la campaña de micromecenalgu. Amás Ringo Rango va aportar indumentaria y Juan Díaz-Faes va facer una intervención artística en directo.
L’agrupación xuvenil de Voces Blancas del Nalón lleva dende 2024 cocinando Voblanaes y el resultáu va poder vese en directo’l 19 de setiembre en La Benéfica (Piloña) nun «eventu enllenu de sorpreses, tanto sonores como visuales, que van facer del espectáculu dalgo que recordar per munchu tiempu», desplica la formación. Llueu, en payares, Voblanaes va cruciar llendes p’aportar al 12th International festival of choirs and orchestras de Viena (Austria), onde van amosar la riqueza de la música asturiana tradicional y contemporánea nesti alcuentru coral.
P’ayudar a financiar los munchos costos d’un proyectu d’esti calter, Voces Blancas del Nalón arrancó hai unos díes un crowdfunding en Goteo.org col que necesiten algamar un mínimu de 13.750 euros. Pa ello piden aportaciones que van dende los 5 euros hasta los 2.000 euros; y n’agradecimientu ufren ilustraciones de los artistes yá mentaos y otres recompenses variaes.
Voces Blancas del Nalón nació hai 17 años y tien el so llocal d’ensayu en Llangréu, nel Conservatoriu Profesional de Música de la Mancomunidá Valle del Nalón. Tienen actuao nuna montonera d’escenarios de dientro y fuera d’Asturies, participando en certámenes, concursos y proyectos internacionales. Tamién n’otres ocasiones con artistes de la música asturiana como Joaquín Pixán, Fernando Valle Roso, Héctor Braga o Víctor Manuel.
Con Voblanaes quieren dar un pasu más: «ye una oportunidá non namás pa conectar cola música asturiana, sinón tamién con quienes la faen posible: compositores, investigadores, cantantes y instrumentistes que sienten que la música asturiana ye un llugar al que mirar y nel que tar«.
Suscríbite a les nuestres novedaes
