El Paséu de la Ilesia de Llastres acueye güei a les 19.30h una actuación gratuita de les tres persones qu’algamaron el I Premiu d’Asturianada La Busdonga que convoca la Conseyería de Cultura, Política Llingüística y Deporte: Lorena Corripio (Categoría Femenina), Carlos Velasco (Categoría Masculina) y Marina Carbajosa (Categoría Moza). Van tar acompañaes de Vicente Prado El Pravianu a la gaita.
Esta actuación de tonada asturiana enmárcase dientro de los XXX Alcuentros cola Cultura Tradicional d’Asturies qu’entama’l Conceyu de Colunga y d’Autores nel Camín, circuitu promovíu pol gobiernu asturianu pa programar actuaciones de quien gana los estremaos premios de música y lliteratura n’asturianu.
Lorena Corripio, Carlos Velasco y Marina Carbajosa tienen tamién más actuaciones programaes dientro d’Autores nel Camín: 26 de setiembre nel Teatru Clarín de Sotu’l Barcu; 10 d’ochobre na Casa la Cultura de Lluanco; 8 de payares nel Teatru Auditoriu de Grau; 11 de payares nel Conservatoriu del Occidente de Asturias (Vil.lar, Valdés); y 5 d’avientu na Casa de Cultura de La Pola Llaviana.
Suscríbite a les nuestres novedaes
