La estaya de Cultura del Conceyu de Colunga ta acabante d’anunciar la programación cultural pal branu. Dientro de la montonera d’actividaes que va haber, la música n’asturianu va tener presencia con delles actuaciones y ciclos: Cancios de Chigre en Colunga y Llastres; conciertos de la Orquesta Céltica Asturiana y LaGuinda; y un recital poéticu musical d’Ana Lamela.
L’axenda arranca colos 31º Alcuentros Cola Cultura Tradicional d’Asturies, ciclu nel que’l conceyu programa actividaes culturales estremaes en collaboración cola Asociación Alcuentros. Na estaya musical van facese los Cancios de Chigre el xueves 9 de xunetu a les 13h en Colunga, coles actuaciones de Lorena Corripio, José Tronco, amás d’Iván Rionda a la gaita; y el domingu 19 de xunetu a les 13h en Llastres con Manolo Roza, Begoña Rodríguez Aranguren, xunto a la gaitera Belén Arboleya.
Dientro d’estos alcuentros enmárcase tamién el conciertu de la Orquesta Céltica Asturiana col espectáculu Del Corri-Corri al siglo XXI, que va poder vese’l 9 de xunetu a les 20h nel Parque Hernán Pérez-Cubillas de Colunga; y La Otra, un recital poéticu-musical nel que la cantautora y escritora Ana Lamela va tar acompañada de delles pandereteres. La cita ye’l 9 d’agostu a les 19h na Plaza Chile de Lliberdón.
Amás, l’Ayuntamientu de Colunga tamién entama’l ciclu de conciertos de branu na cai Musicalle, nel que va celebrase una actuación de LaGuinda, grupu astur-francés qu’entemez la música asturiana con otros sones del mundu y qu’actúa pa esta ocasión en formatu tríu. La cita va ser el xueves 16 de xunetu a les 20h nel parque Parque Hernán Pérez-Cubillas de Colunga.
Suscríbite a les nuestres novedaes
