Ayeri les persones ganadores y finalistes nel II Premiu Obdulia Álvarez «La Busdonga» d’Asturianada -Alicia Villanueva, Esteban Verdeja, Néstor Díaz, Lorena Corripio, Manuel Roza y Marina Carbajosa-, amás de los presentadores de la gala -Miguel Ánxel Montenegro y Esther Fonseca-, aconceyaron col presidente asturianu, Adrián Barbón, y la conseyera de Cultura, Política Llingüística y Deporte, Vanessa Gutiérrez. Tres del alcuentru anuncióse que los tres cantadores ganadores van actuar na próxima edición del Festival Intercélticu de Lorient. Va ser la primer vez qu’esti gallardón tea presente nel festival más importante del mundu celta, col oxetivu de dar continuidá a esta collaboración en futures ediciones.
Esta iniciativa surde d’una collaboración ente la Conseyería de Cultura y el responsable de la delegación asturiana de Lorient, Iñaki Santianes, y respuende a lo que dende’l gobiernu asturianu califiquen como «un compromisu que contribúi a ampliar la proyección internacional de la canción asturiana y asegurar la presencia de les sos meyores voces nun eventu qu’axunta añalmente a más de 950.000 visitantes, lo que supón un escaparate privilexiáu pa la difusión de la música y la cultura asturiana a nivel internacional».
D’esta manera, na edición d’esti añu van incorporase a la delegación asturiana los ganadores de les distintes estayes d’esti concursu entamáu pol gobiernu asturianu: la yerbata Alicia Villanueva Megido (vencedora de la categoría femenina); el cántabru Esteban Verdeja Martínez (ganador de la estaya masculina) y el llaniscu Néstor Díaz González (primer premiu na categoría moza). Dende’l gobiernu asturianu y la delegación de Lorient n’Asturies tán trabayando pa que, dende esti añu, los ganadores de cada edición d’esti gallardón formen parte de la delegación asturiana que participa añalmente nel festival bretón.
El Premiu Obdulia Álvarez «La Busdonga» d’Asturianada nació en 2024 pa da-y puxu a la tamién llamada tonada o canción asturiana; manifestación musical tradicional tresmitida oralmente durante sieglos que pol so valir históricu, artísticu y social foi declarada Bien d’Interés Cultural (BIC) de calter inmaterial pol Principáu d’Asturies en 2015. El certame tien una dotación de 15.000 euros, distribuyida en tres categoríes: femenina y masculina, con 6.000 euros cada una, y xoven, con 3.000 euros, dirixida a intérpretes menores de 22 años; amás d’entrar a formar parte del circuitu Autores nel Camín.
Con este gallardón -del que ta trabayándose pa que l’añu viniente incorpore la denomación de Nacional nel so nome-, l’Executivu autonómicu tamién reivindica la heriede de la muyer que da nome al premiu, Obdulia Álvarez Díaz «La Busdonga» (1896-1960), una de les voces más destacaes del sieglu XX, reconocida pol so potencial vocal y pol so estilu únicu d’interpretar esti xéneru. La so forma de sentir y tresmitir convirtióla nun símbolu de la música popular asturiana y tovía güei sigue siendo una fonte d’inspiración pa les xeneraciones nueves d’intérpretes.
Suscríbite a les nuestres novedaes
