La XIX Feria de Seronda d’Illas va celebrar los díes 17 y 18 d’ochobre en La Caizuela una nueva edición con música en directo, actividaes infantiles y una programación que combina la tradición, l’artesanía y los productos del entornu rural.
Les actuaciones musicales van repartise ente les dos xornaes de la feria. El sábadu 17 d’ochobre, a les 20:00 hores, el programa inclúi una actuación de Los Gascones, dempués de la inauguración oficial, prevista pa les 12.00 hores, y de la tercera edición del concursu de bizcochos de maíz, que va celebrase a les 18.00 hores.
El domingu 18, la música va siguir a les 13:00 hores cola actuación de Leirana, el proyectu encabezáu pol músicu Nel Villanueva que fai un repás a la tradición musical asturiana con pieces afeches pal baille. Pela tarde, a les 17.00 hores, Ximielga la Saya va poner el ramu a la programación musical, siguiendo cola música tradicional y el baille.
La feria va contar amás con un mercáu d’artesanía y productos agroalimentarios, con presencia de productos de la güerta, cestería, madera, quesos, tortos, miel, picadiellu, adobu, castañes, sidra y repostería casera. Tamién van celebrase demostraciones d’oficios artesanos como la ferrería, la tornería, la cestería, el filáu y el telar.
Suscríbite a les nuestres novedaes
