Leirana, el proyectu nuevu de Nel Villanueva, asoleyó’l pasáu vienres 8 de mayu, Día de les Lletres Asturianes 2026, el so primer videoclip. Fíxolo de la mano de Mateo López, que tamién s’estrena como realizador. El cantar escoyíu pa ello ye «Añada pa Rocío y Corralín y grabóse nel conceyu de Grau.
El videoclip surdió a petición del propiu músicu, profesor de baille de Mateo. D’esta manera, la idea según el realizador yera treslladar los sones a lo visual y espresar lo que sienten tanto Mateo como Nel, dando más puxu al proyectu de Leirana. Pa ello, aprovecharon la Flor de Grau, en metá del mercadón nel casu de la parte del Corralín, mientres na añada lo que se puede ver ye al propiu Nel n’escenes cotidianes, preparándose pa baxar a esi mercáu. Pa Mateo, l’añada representa la tranquilidá, mientres que cola xota españa’l color y aporta l’allegría a la pieza audiovisual.
El cantar cuenta cola voz y pandereta de Nel Villanueva, el curdión de Satur Vega y la flauta de David Fernández, amás de la collaboración nel baille d’Araceli García Díaz, Diego Pando, Lore García y Marta Muñiz, cola producción musical al cargu de 15:40 Estudios.
Suscríbite a les nuestres novedaes
