El Mercáu Quirosán de Bárzana aporta a la edición númberu diecinueve esti fin de selmana. Amás del mercáu y de delles actividaes y talleres pa tola familia, la música y la cultura tradicional protagonicen l’eventu. El V Alcuentru de Bandes Gaites y los conciertos d’Herbamora, La Garrapiella y Anabel Santiago dan forma a la programación del sábadu 29 y domingu 30 d’abril.
El sábadu 29 a les 12h actúen en sesión vermú les mítiques pandereteres Herbamora mientres que pela tarde’l protagonismu va ser pa les agrupaciones que trabayen cola cultura tradicional del país. A les 18h desfilen delles bandes de gaites y agrupaciones folclóriques per Bárzana y a les 19h ye’l VI Alcuentru de Bandes de Gaites nel qu’actúen La Madreña (Llanera), Bico da Balouta (Pontevedra), El Gumial (Ayer) y la llocal y organizadora del eventu Teixo Manolo Quirós.
El domingu 29 d’abril la bandina La Garrapiella va amenizar la sesión vermú a les 12.30h, a les seis de la tarde actúa Anabel Santiago y les actividaes musicales rematen a les 19h con un taller de baille impartíu por Muyeres por Grau. Sicasí, el Mercáu Quirosán ye muncho más que música asturiana, por eso va haber tamién artesanía, xuegos tradicionales, talleres pa la reciella, oficios tradicionales y chigre.
Suscríbite a les nuestres novedaes
