Un 6 de xineru de 1987, nunes cocheres de Castañeda (Corvera), axuntábense cuatro rapazos col enfotu d’entamar un grupu de rock que cantare n’asturianu; aquello foi l’orixe d’una de les bandes más importantes del panorama musical del país: DIXEBRA.
Los sos comienzos nun foron fáciles, con un asturianismu centráu daquella nel mundu del folk y una escena rockera que nun taba avezada a sentir la llingua asturiana fuera d’esi contestu sonoru.
Naquel tiempu si un grupu quería dase a conocer lo más normal yera grabar una maqueta que s’espardía en formatu casete de mano en mano y peles emisores radiofóniques. Asina foi precisamente como Dixebra principió la so particular campaña de promoción nel primer añu de vida.
Al más puru estilu punk DIY (Do It Yourself/Failo tú mesmu-a) grabaron una a una cien cintes conteniendo once temes, ocho d’ellos grabaos na desapaecida Pista de La Esposición d’Avilés el 27 de mayu de 1988 y ún nel Campu los Patos d’Uviéu el 18 de marzu d’esi mesmu añu; los dos temes restantes pertenecen a una maqueta casera grabada unos meses enantes nel so local d’ensayu. Nesta primer muestra del so llabor llama l’atención que yá apaecen dellos samplers (muestres de soníu) con estractos d’entrevistes o eslóganes glayaos en manifestaciones; dalgo que diba ser una constante a lo llargo de los sos trabayos discográficos.
Suscríbite a les nuestres novedaes
