«Roses» ye’l títulu xenéricu del trabayu nuevu del músicu Fran Avilés, una entrega más del so llabor compositivu que vien a unise a los anteriores «Proyecto Sol» (2012), «Dos» (Ep, 2015, algamando’l primer premiu del Concursu de Maquetes COMA) y «Canciones de amor y sombra» (2017).
L’estilu nel que se mueve va del folk a la canción d’autor, con testos onde lo social, lo político o lo existencial tán presentes, too ello trescaláu d’un tonu ente irónicu y surrealista. La novedá d’esti discu qu’agora presenta ye qu’inclúi dellos temes en llingua asturiana, pa lo que cuenta cola ayuda de la escritora Laura Marcos («Añada pa Irene»), el componente de Felpeyu Ruma Barbero («Lleenda») o’l tamién escritor y periodista Francisco Álvarez («A ras de suelo»).
L’enclín socio-políticu de dellos de los cantares de «Roses» queda claro, por exemplu, na introducción precisamente del tema que da títulu al discu, na que suena un estractu del discursu radiofónicu del Presidente del Conseyu francés Paul Reynaud del 26 de marzu de 1940, emitíu a nivel mundial selmanes enantes del ataque alemán sobre Bélxica y Francia; un cantar interpretáu n’asturianu, catalán, inglés y castellanu. Otra muestra d’ello ye «A ras de suelo», na qu’una voz n’árabe fala de la situación del pueblu saharaui, amás de collaborar la cantante d’esa nacionalidá Lehdia Sueliki. Ente la crónica social y la descripción de determináu paisanaxe xixonés trescurre la pieza titulada «123 Blues».
Roses yá puede sentise nes principales plataformes musicales, a la espera de poder dir presentándolu en directo.
Suscríbite a les nuestres novedaes
