Los años 90 del sieglu XX foron bien granibles pa la música asturiana, nellos disfrutemos d’un dinamismu na escena del país perimportante, con numberoses formaciones de folk, una rede d’alcuentros, festivales y Nueches Celtes bien trabada per tola nuestra xeografía, compañíes discográfiques y abondes producciones.
Ye xustamente nos primeros años d’aquella década cuando desenvuelve la so actividá un grupu de nomeLlaímo —topónimu del conceyu de Sobrecobiu—. Tratábase d’un proyectu dirixíu por David Varela (acordión diatónicu, tambor asturianu y voz) y Jorge L. González (gaita, flauta y coros), al que s’axuntaben otros intérpretes aleatorios pa los conciertos y les grabaciones; en 1993 rexistraríen una maqueta con un par de pieces, nes que con un bon soníu amosaben el so estilu particular. Siete años más tarde diben incluir otros dos temes nel recopilatoriu tituláu Xeneración Folk (Discos L’Aguañaz), nes que siguíen cola mesma llinia sonora. Llaímo practicaben un folk acústicu de calter progresivu perinteresante, alloñándose de la tendencia más avezada naquella dómina, esta propuesta tan especial ufiertába-yos una personalidá bien marcada nel conxuntu de la música del país.
Pa conocer más fondamente la filosofía musical d’esta formación, recuperamos aquella primer maqueta coles pieces «De Xixón a Cuba» y «Reels-Gondixu». Son dos composiciones de desarrollu llargu, cambios de ritmu y ambiente prog, nes que’l pesu melódicu llévenlu l’acordión y la flauta/gaita. Depués d’unos años n’activo y de tocar en bien d’aquelles históriques nueches celtes, diben dexar los escenarios, pasando dellos de los sos miembros a integrar o formar otres bandes.
David Varela (tamboriteru) y Jorge L. González (gaiteru) coinciden primeramente na Banda Gaites y Tambores de Lleoriu, que furruló a finales de los 80. Nel 1989 grabaron con esta formación un tema nel LP compilatoriu Tonada 2.
Esi mesmu añu coinciden estudiando maestría industrial na Fundación Revilla-Gigedo y ye onde entamen la so andadura; Jorge cola gaita, flauta y whistle y David con teclaos, acordión piano, guitarra y percusiones. Tres dellos años actuando en dúu per llocales y fiestes del norte la península, en 1993 graben la so maqueta col sofitu del Taller de Músicos de Xixón, baxo la tutoría de Xuan Nel Expósito y Carlos Redondo, colos que David diba a clase.
Pa esta maqueta incorporen coles guitarres (acústica y eléctrica), y la voz a Roberto Gómez (anguañu en Pulsar To Floyd). Nos directos per esa dómina, yera habitual velos con Jorge Cembranos a la guitarra acústica, Manuel Durán con Tambores y Bodhram, y Juan Carlos Varela, cola gaita.
A partir del 95 xunto con David, Jorge y Roberto, entamen Javier de Copaud col baxu elléctricu y Juan Luis Noval col bodhram, colo que consoliden en quintetu y foi la formación que más se vio pelos escenarios asturianos demientres la segunda mitá de los 90: nueche celtes de Corvera, Granda, Soto d’Ayer, Porcia, etc, Conciertos de la Oficialidá, Intercélticu del Occidente…y habituales de chigres musicales como’l Cafetón n’Avilés o’l Trisquel de Xixón n’onde yeren «folkis residentes».
Hacia’l 98 dellos de los músicos de Llaimo entamen a tocar con otres formaciones y a profesionalizase per rames dixebraes y apárcase’l proyectu.
Nos postreros años xuntáronse pa ocasiones mui concretes, contando con músicos como Pablo Pumarada a les percusiones y Paula Alonso al vigulín, y nel añu 2000 Xune Elipe propón-y a David participar nel compilatoriu Xeneración Folk, Nuevu Folk Asturianu Volumen 2 pa lo que deciden volver a la so formación de dúu orixinal.
Nesti hestóricu CD graben otros dos 2 temes nel qu’amás de la gaita de Jorge, y David con voz, guitarra, Bodhram y acordeón diatónicu, acompáñense de Paula col vigulín y Luis Rodríguez » Luigi Tudermis» col baxu eléctricu.
Jorge y David tocaron xuntos nuna postrer vegada nun Arte na Cai, en Xixón nel 2002, depués de dellos años siendo pareya tradicional de gaita y tambor pa una montonera de grupos folklóricos. En 2024 David foi convidáu a tocar na XXV Nueche Celta de Granda (Xixón), ya que Llaimo foi’l primer grupu folk en xubir a esi escenariu, xunto con Xéliba, Felpeyu y El tambor de L’Abadía.
Suscríbite a les nuestres novedaes
