«Maramoniz ye continuar cola vida, básicamente»
Depués de más de dos años, Mapi Quintana vuelve a los escenarios con un proyectu propiu. Esta artista que lleva más de dos décades participando en formaciones rellacionaes col jazz, cola música tradicional asturiana y cola improvisación, estrena’l próximu miércoles 29 d’avientu el so nuevu espectáculu: Maramoniz. El Teatru Vital Aza de La Pola L.lena va acoyer, a les 20h y con entrada de baldre, esti conciertu nel que Quintana va interpretar «música tradicional non tradicional» xunto colos pianistes César Latorre y Sonia Cartón y el percusionista Juanjo Díaz.
«Tres del fallecimientu de mio güela a lo primero del andanciu, rescaté una sesión d’una grabación que ficimos na so cocina un día que fui a vela y que-y pidí que me cantara unes canciones. Entós quixi reellaborar esos cantares y ponelos xuntos nel repertoriu con otres canciones que fueron llegando a mí», comenta Quintana sobre’l raigañu musical de Maramoniz, proyectu que lleva por nome’l pueblu de «güelita María», en L.lena. Amás d’esto, la cantante y contrabaxista añade que la iniciativa nació «de la necesidá de siguir faciendo mùsica» depués de perder al so compañeru Elías García, col que grabó’l discu ‘Severina‘ y actuaba en formatu dúu. « Pasé dos años ensin facer música propia y poco a poco el duelu foi faciéndose más llevaderu y llegó’l momentu nel que me vi preparada pa salir al escenariu a defender dalgo propio», matiza l’artista.
En Maramoniz van poder sentise «melodíes tradicionales, canciones y temes que nun tien forma de canción, que son composiciones más abiertes. Va haber improvisación, voz y munchos teclaos, sintes, pianos, instrumentos de percusión electrónica y acústica mui variaos…», adelanta Mapi Quintana sobre esti show nel qu’estos músicos de formación jazzística, clásica y tradicional, reinterpreten la tradición dende una visión nueva, toquen cantares de composición propia y tamién rescaten dalguna de les pieces que quedaron ensin grabar del proyectu de Mapi Quintana & Elías García que, anque Quintana reconoza que «en principio nun quería saber nada d’elles», esclaria que a la fin paeció-y que «yera xusto que se siguieran faciendo», porque Maramoniz ye «continuar cola vida, básicamente» .
Más conciertos
«La idea ye qu’esti proyectu dure muncho tiempu, porque tovía tenemos muncha mecha y tamos topando un soníu que nos ta prestando muncho», diz Mapi Quintana sobre los planes de futuru de Maramoniz, un nome nuevo pa la música asturiana depués de qu’esta reconocida artista l.leniza participara tocando y grabando tanto en formaciones como Blima, Aire, Rodrigo Cuevas, o Eladio Díaz Folk Ensemble, como a dúu col mentáu músicu folk Elías García; y a tríu con Michael Lee Wolfe y Jacobo de Miguel (‘Xota pa Tres’). Amás del conciertu del 29 en L.lena pa presentar Maramoniz, Mapi Quintana va tar tamién xunto a César Latorre en formatu de dúu jazz nel festival Jazznes, el próximu llunes 27 d’avientu a les 19h nel Casinu de Llanes.
