L’artista llangreana Marisa Valle Roso sigue dando novedaes del so esperáu próximu trabayu discográficu. A traviés de les sos redes sociales anunció’l nome del que va ser el so cuartu discu, Cenicientes, y la fecha del conciertu de presentación. El 18 d’ochobre a les 20h el Nuevu Teatru de La Felguera va acoyer esti espectáculu pal que yá tán a la venta les entraes por un preciu de venti euros.
«Cenicientes va ser el nome del mio próximu discu por munches razones que vos voi dir contando y va asoleyase dafechu en setiembre. Esti discu nació equí, en casa, y bebió de tolo que m’arrodia, polo que nun podía estrenalu n’otru sitiu», desplicó l’artista p’anunciar la so primer actuación tres de llanzar esti trabayu nuevu.
Dende febreru de 2025 Marisa Valle Roso vien publicando dellos adelantos de Cenicientes a traviés de les plataformes musicales. El feminismu, la llucha pola xusticia social, la reivindicación de la memoria colectiva asturiana y de la identidá d’esti país son dalgunes de les temátiques presentes nestos cantares influenciaos musicalmente pola canción d’autor, el pop, la electrónica y la canción asturiana.
Tres de la so actuación nes fiestes de San Xuan de Mieres, la siguiente oportunidá pa sentir en vivo estos temes nuevos -xunto a otros de l’artista llangreana-, va ser el 2 d’agostu nel prestixosu Festival Interceltique de Lorient, en Bretaña.
Suscríbite a les nuestres novedaes
