El pasáu 30 d’ochobre estrenóse XtraRadio_Musiqueres, un proyectu de creación musical, patrimoniu sonoru y producción audiovisual fechu dende la Casa de les Radios de Suares (Bimenes). Na primer temporada participen un total de seis artistes d’Asturies de los que dos formen parte de la escena musical n’asturianu: Marisa Valle Roso y PVXARRA. Les grabaciones recueyen actuaciones en vivo en sesiones íntimes cola interpretación d’ente trés y cuatro pieces y van dir publicándose progresivamente na canal de YouTube de la iniciativa hasta finales d’avientu.
«La escoyeta artística reflexa la diversidá y riqueza de la escena musical d’Asturies: una combinación de xéneros, estudios y universos creativos na que conviven bandes consolidaes y proyectos emerxentes, voces con trayectoria y propuestes nueves que tán construyendo’l presente y futuru de la nuestra música», desplica Mónica Cofiño, directora artística d’una propuesta cola que busquen «abrir víes nueves de collaboración ente artistes, profesionales del sector, instituciones y axentes culturales pa xenerar oportunidaes nueves pa la creación y difusión cultural».
Tres d’estrenar yá el videu de Lorena Álvarez y Techo de Cristal, nos próximos díes va poder vese la grabación de PVXARRA y n’avientu la de la Marisa Valle Roso. La iniciativa tien un equipu ampliu y multidisciplinar: Sandra F. Sienra (dirección de producción); Cristina Busto (dirección d’arte); Aida Villazón (auxiliar de producción y mediación de públicos); Juan A. García, Eloy Couceiro y David Álvarez (dirección de fotografía); Javier Montes Vicente y Rodrigo Gómez (dirección de soníu); Eloy Couceiro (edición) y Estudio Estanco (montaxe sonoru); y cuenta cola financiación de la Conseyería de Cultura, Política Llingüística y Deporte.
Nel primer capítulu de XtraRadio_Musiqueres puede vese l’actuación de Lorena Álvarez, artista orixinaria d’Ibias que, como presenta la iniciativa, tien una propuesta «qu’entemez tradición, folclor y contemporaneidá nun universu creativu propiu, onde conviven música, poesía y conexón cola tierra». La banda que l’acompaña, Techo de Cristal, cunta con destacaes intérpretes de la escena asturiana: Vero Rubio, Ana Pereda (LaGuinda), Sara F. Friera (Coru Al Altu la Lleva, Ser Quien a Cantar), Cova da Silva (Pop Piquiñín), Rita Ojanguren y Julia Fernández. Xuntáronse per primer vegada nel 30º aniversariu de la reapertura del Teatru Xovellanos pa reivindicar la igualdá nos escenarios.
Suscríbite a les nuestres novedaes
