Dende esti vienres hasta la última selmana de marzu, la gaita protagoniza delles presentaciones, alcuentros, conciertos y xornaes dientro y fuera d’Asturies. El primer eventu ye la presentación na Llibrería Trabe d’Uviéu de la reedición del primer volume del métodu de gaita de Flavio R. Benito, Alborada. La cita col autor, Rodrigo Joglar y Esther Prieto, que van acompañalu, ye esti vienres 28 a les 19.30h.
Darréu, ente’l sábadu 1 y el llunes 3 de marzu, el Centru Asturianu de Mendoza n’Arxentina celebra’l so 110 aniversariu nuna xuntanza con otros Centros Asturianos del Cono Sur -Rosario, Santa Fe y La Plata- y la colectividá asturiana de Santiago de Chile. Va haber un pasucáis d’una banda gaites y, amás d’otres actividaes como la celebración del antroxu, un alcuentru de gaita y baille asturiano.
Per otru llau, de vuelta n’Asturies, el Conceyu de la Gaita entama’l 9 de marzu dende les 10.30h una bayura d’actividades d’accesu llibre pol Día Internacional de la Gaita nel Aula Didáctica del Muséu de la Gaita en Xixón -nel Muséu del Pueblu d’Asturies-. Nel eventu va haber una ponencia de Susana de la Cruz Rodríguez, dos presentaciones -l’últimu llibru de Ricardo Soberado y Balbino Menéndez, y la gaita en Fa pa neños y neñes- y un homenaxe a la gaitera Keti García González. La celebración, que tamién va cuntar cola presencia de la Conseyera de Cultura, Política Llingüística y Deporte, va finar con una espicha pa la que ye necesario enllenar un formulariu, amás d’abonar el preciu.
Los conservatorios de música asturianos súmense a l’axenda d’eventos venceyaos al instrumentu con delles actividaes pedagóxiques. L’Aula de Gaita del Conservatoriu Superior «Eduardo Martínez Torner» (CONSMUPA) va treslladase’l martes 11 de marzu al IES Aramo d’Uviéu pa interpretar el conciertu didácticu Gaiteres: un percorríu pela presencia de la muyer nel mundu de la gaita. La siguiente selmana, el sábadu 22, l’edificiu del CONSMUPA va acoyer la I Xornada Les Enseñances de la Gaita n’Asturies. Los estudios reglaos de gaita asturiana. Esi mesmu día, Hevia toca nel Teatru Campoamor y, pa zarrar el mes, va alcontrase col alumnáu del CONSMUPA y los Conservatorios Profesionales d’Uviéu y Xixón el miércoles 26, dientro de les Xornaes Culturales del Conservatoriu Profesional «Anselmo González del Valle» (Uviéu).
Suscríbite a les nuestres novedaes
