Del 8 al 10 d’abril vuelve Música en Rede. Alcuentru profesional, les xornaes profesionales entamaes pola Conseyería de Cultura, Política Llingüística y Deporte -a traviés de Cultura en Rede- nes qu’hai meses de debate (Conxustes), presentaciones (Rolda), talleres formativos (Erbíes), showcases (Llabor) y puntos d’asesoramientu (en rede) pa que «artistes, profesionales y públicu tengan oportunidá d’interactuar y texer redes, amás de ser un escaparate pa visibilizar, dinamizar y profesionalizar la música emerxente fecha n’Asturies». Pa esta segunda edición ta acabante d’abrise’l plazu hasta’l 7 de marzu de recepción de propuestes pa los alcuentros comerciales (Xuntes) y les presentaciones curties (Rolda).
Les presentaciones curties tán feches pa «captar l’interés de públicos estremaos, incluyendo asistentes al eventu, potenciales collaboradores, socios inversores, patrocinadores públicos…». Son ponencies de cinco minutos nes que pueden usase materiales d’apoyu y con elles náguase por que los y les ponentes «destaquen el valir artísticu, el potencial de mercáu y la capacidá de xenerar impactu cultural y económicu». Van escoyese un mínimu de 20 presentaciones, que van facese’l miércoles 9 y xueves 10 d’abril ente les 15:45 y les 16:45h y pa poder participar nelles hai qu’inscribise a traviés d’esti enllaz.
D’otra banda, les Xuntes son «alcuentros comerciales breves que s’entamen col enfotu de promover la conversación y l’asesoramientu ente asociaciones, empreses, artistes, programadores, xestores culturales, profesionales de la comunicación y managers pa favorecer la cooperación, l’intercambiu de conocimientos y el desendolcu de futures sinerxes dientro del sector«. Van facese’l miércoles 9 d’abril de 13h a 14h y pa poder participar nelles hai qu’inscribise a traviés d’esti enllaz.
Dende Asturies Cultura en Rede -organizadora de Música en Rede- anuncien tamién que’l llunes 3 de marzu van dar a conocer la programación completa d’esti alcuentru de la industria musical profesional a traviés de la so web.
Suscríbite a les nuestres novedaes
