Esti vienres 8 de payares a les 19h tien llugar nel Teatru La Llaboral de Xixón la gala final del XVI Premiu Camaretá al Meyor Cantar, l’únicu premiu institucional qu’esiste anguaño pa da-y reconocimientu a la creación orixinal de música fecha n’asturianu o gallego-asturianu. La Bonturné con «Odisea la nuí«, Susana Gudín con “Contigo“, Ferla Megía con “Medrana a Medrar“ y Héctor Braga con “Llobatu“, son los cuatro grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.
Siguimos el cuestionariu con Ferla Megía, una propuesta música tradicional, urbana y electrónica. Según recueye la web oficial del premiu «L’artista crea atmósferes con una variedá mui amplia de samples y inspiraciones, y la so capacidá innata pa la melodía vese rematada con una puesta n’escena onde xuega con bases qu’aporten capes y que se sumen al panderu y la flauta, encargaos de tener pelos cantares. Trátase d’una figura que vive la música ensin limitaciones y, claramente, una de les más inquietes de la escena asturiana, trabayando sobre un paragües d’abondes varielles y que bebe tanto de los últimos soníos urbanos como de la música tradicional d’Asturies».
¿Qué supón pa ti la nominación nesti premiu y qué supondría ganalu?
Tar nomináu ye, pa entamar, un arguyu tremendu. Delles vegaes póngome a pensar en qu’esto ye daqué que faigo por meru entretenimientu na mio casa, y que pasín a pasu veo que los mios cantares lleguen a la xente, cantares como «Medrana a Medrar», que son d’una sinceridá visceral respecto a los sentimientos que nella falo… ye daqué que, honestamente, enxamás pense que podía sucedeme. Pa min ganalu supón, sobre too, un emburrión y un ánimu pa seguir faciendo lo que me presta, pa intentar profesionalizar el mio arte. En definitiva, ye una manera d’entender que pueo dedicame a facer música, a tresmitir y, amás, faciéndolo n’asturianu y venceyáu a la mio tierra.
¿Por qué escoyisti esti cantar pa concursar?
Creo que ye’l cantar más desgarrador qu’enxamás escribí… ye importante pa min y, dende que lu entamé, dime cuenta qu’había más xente que taba nuna situación asemeyada. Cuando miramos al futuru, la mio xeneración nun tenemos nada claro. Necesitamos vivienda digna y de calidá, el cambiu climáticu va dexanos un paisaxe xodíu, etc… ye desalentador enforma y d’ehí esa “medrana” a crecer y avanzar… Creo qu’esti cantar resúmelo bien.
¿Tienes daqué especial preparao pa l’actuación del domingu?
Inda toi pensando si tocalu na gala con tola instrumental o si lu voi facer a pelu cola guitarra, que me paez mas cercano. ¡Pensarélo un ratu enantes! (Rises).
Suscríbite a les nuestres novedaes
