Yá pue mercase na tienda online de musicasturiana.com y en llibreríes Nel cantu la memoria. Ensayu sobre l’asturianada tradicional, la obra cola qu’Héctor Braga ganó’l XXIX Premiu Máximo Fuertes Acevedo d’Ensayu que concede’l gobiernu asturianu. Trátase d’un trabayu perinteresante que percuerre esti xéneru musical dende 1795 hasta 1966 a lo llargo de 334 páxines.
Nesti ensayu, el músicu y doctor n’Historia del Arte y Musicoloxía céntrase nuna montonera cuestiones: les característiques y oríxenes del xéneru; les diferencies ente los términos tonada, asturianada y canción asturiana; les obres científiques anteriores sobre esta cuestión; les lletres y l’usu del asturianu nelles; los concursos; la industria fonográfica; les grabaciones de campu; los acompañamientos instrumentales; los palos del xéneru; la trescripción en partitures; les figures clásiques… ente otres munches coses.
«Quixi intentar facer EL llibru en cuenta d’UN llibru», plantega l’autor pa ilustrar lo completo d’un ensayu científicu que resume y «traduz a un llinguaxe más divulgativu» les más de 600 fueyes que dieron forma a la tesis doctoral cola qu’Héctor Braga algamó un sobresaliente cum laude. D’esta manera, la obra organízase en cuatro bloques temáticos principales: «C de conocer, C de caltener, C de comunicar y C de concursar» na que fala de les cuestiones mentaes anteriormente y de munches más, porque l’ensayu repara hasta n’aspectos rellacionaos cola memoria histórica durante una dictadura que «reconoció a los cantadores afines» y «condergó al exiliu» a otros personaxes clave como El Polenchu o Eduardo Martínez Torner.
Apéndiz sonoru
Amás d’esto, Nel cantu la memoria tamién tien un estensu apéndiz documental y apéndiz sonoru que recueye nun códigu QR 480 audios de discos comerciales y grabaciones de campu anteriores a 1966 -fecha na que les obres yá nun son de dominiu públicu y tán protexíos por derechos d’autor, polo tanto «yá nun son tradicionales», como desplicó l’autor-. Con esto, reflexa un llabor de «11 años guetando per archivos de dientro y fuera d’Asturies».
«Escribí l’ensayu pensando n’aquellos cantantes actuales abiertos al conocimientu de la ortodoxa del xéneru, pero sobre too pa los que vengan dempués. Pa que nun tengan namás que sentir grabaciones históriques y calcales, sinón que tengan tamién una referencia escrita y unes ferramientes d’aprendizaxe, enseñu y creación», plantega l’autor sobre una obra imprescindible que da respuesta tamién a les inxusticies qu’él mesmo vivió: Yye un trabayu de rebeldía contra lo que me tresmitieron, bien de profesores, en Conservatorios aú estudié, tanto n’Asturies como en Castilla y León. Ellí decíen que ser cultu yera sentir a Bach mientres torcíen el focicu cuando sentíen una asturianada. Y eso nun ye ser cultu; ye clasismu. L’asturianada ye la voz d’esti pueblu, asina que vamos mirar por ello».
Suscríbite a les nuestres novedaes
