El pasáu 12 d’abril salía en toles plataformes musicales II, el segundu trabayu discográficu de la banda post-rock Melandru. Tres más d’un mes de rodaxe, la formación maliaya va presentalu en directo en casa y con delles collaboraciones. La cita va ser esti sábadu 25 de mayu a les 20.30h (con apertura puertes media hora enantes) nel Teatru Riera de Villaviciosa y van andechar col cuartetu la Banda Gaites Ribeseya, el músicu sevillanu afináu n’Asturies Doce Fuegos, y la vocalista Nieves del Valle. La entrada ye de baldre.
II ye un EP que formáu por cinco temes nos que «l’estilu sigue siendo’l post-rock, pero agora lleva un camín daqué menos escuru; con más contraste ente lluz y escuridá que l’anterior EP», desplica’l gaiteru de la formación Álvaro Cueto. Nestos cantares nuevos pue sentise tamién «más instrumentalización», porque dende va tiempu la banda ta amestando la so música con influencies de la electrónica y hai cantares como’l single «Shinji sube al EVA« nel que pue sentise «un xiru estilísticu, con influencies del shoegaze o’l dream pop; con testures denses y cambiantes»,
Con esti álbum Melandru sigue afondando na so propuesta caracterizada por tener un soníu envolvente, delles veces raspiando lo escuro, onde prima lo instrumental, anque la voz tamién tien el so espaciu. Pente la so instrumentación destaca l’emplegu de la gaita tradicional, que-y aporta personalidá y un toque orixinal, más cuando apaez nun contestu ayenu dafechu a lo tradi. El resultáu final ye un ambiente sonoru averáu al llamáu post-rock, pero con delles testures acústiques qu’aporten el contrapuntu a los pasaxes más crudos; too ello apórta-yos singularidá dientro del rock fechu en llingua asturiana. Esti sábadu va poder comprobase col so conciertu en Villaviciosa.
Suscríbite a les nuestres novedaes
