La Oficina de Normalización Llingüística de Xixón continúa coles actividaes de celebración del so venti aniversariu y entama, xunto al Taller de Músicos de Xixón, una edición nueva de los Alcuentros de Músiques Asturianes. Nesta ocasión, amás de les actuaciones musicales de La Maramoniz, Draque y Alienda, va haber una tarde en danza con Pandereteros d’Anguaño y 6 Riales, la presentación del llibru La Xorda de Rodrigo Cuevas y un alderique alredor del relevu xeneracional na música tradicional asturiana. Too ello ente’l 4 y el 21 de xunu, n’estremaos espacios de la ciudá y con entrada llibre.
Les xornaes entamen el martes 4 de xunu cola presentación del llibru La Xorda. Nuevos cantares de chigre na que van intervenir l’autor Rodrigo Cuevas, l’editor Xaime Martínez y la escritora xixonesa Pilar Sánchez Vicente. L’actividá va ser nel patiu del Centru de Cultura Antiguu Institutu a les 19.30h y pa poder dir como públicu hai qu’acutar entrada nesti enllaz a partir del 3 de xunu a les 8.30h la mañana. El miércoles 5 el patiu del CCAI acueye tamién el conciertu de La Maramoniz, el proyectu de Mapi Quintana inspiráu nos cantares que deprendió de so güela y qu’entemez con improvisación, jazz y otros sones de vanguardia.
La siguiente actuación musical ye la de Draque. El tríu de folk de cámara formáu por tres de los intérpretes más mozos de la música asturiana: Celia Corrales (voz y pandereta), Celia Nieto (vigulín) y Julio Rodríguez (bouzuki) actúa a les 19.30h nel Muséu Casa Natal de Xovellanos, en Cimavilla. Y precisamente ye la mocedá la que protagoniza l’actividá del xueves 13; un alderique entituláu El relevu xeneracional na música tradicional asturiana que se celebra nel patiu del CCAI a les 19h. Nél van participar la yá mentada Celia Corrales, el músicu y pedagogu Rodrigo Joglar, y l’etnomusicólogu y profesor de baille Santi Galguera. La mesa redonda modérala Xicu Ariza, responsable de Musicasturiana.com.
La programación tamién va tener una «tarde en danza al mou Xixón» na que, como presenta’l programa informativu, nun importa «que tengas más o menos ritmu o que pises a la to pareya; lo importante ye baillar y pasalo bien». D’esta miente, el patiu del CCAI va enllenase el vienres 14 de xunu dende les 20h de xente pa baillar al son que va poner los tríos de música tradicional Pandereteros d’Anguaño y 6 Riales. Pa rematar les actividaes d’estos alcuentros, el grupu de folk celta Alienda va tocar nel Solarón el 21 de xunu a les 19h nun conciertu col que’l Conceyu festexa’l Día Européu de la Música.
El calter participativu de la música
Montserrat López, conceyala de cultura de Xixón; María Xosé Rodríguez, responsable de la Oficina de Normalización Llingüística d’esta ciudá; y Eduardo G. Salueña, del Taller de Músicos de Xixón, presentaron esta mañana en rueda prensa la décimo segunda edición d’estos alcuentros. «Nesta ocasión la seleición de propuestes pon l’énfasis nel componente de ritual social y cultural participativu que tien la música, lo que supón redondiar la idea d’alcuentru al rodiu la música asturiana, y que tamién se manifiesta en cantidá de formatos», desplicó Rodríguez na so intervención. Too esto refléxase na «apuesta por sones como’l jazz, el folk o les músiques tradicionales, xeneradores de munches d’estes dinámiques», como sorrayó Salueña. Asina ye como estos Alcuentros siguen evolucionando, collaborando con axentes culturales y ufriendo formatos orixinales; una amuesa del dinamismu y la participación que ta detrás del conceptu d’esta nueva edición.
Suscríbite a les nuestres novedaes
