LaGuinda, un amiestu de músiques del mundu con fondu raigañu asturianu

La señaldá ye un sentimientu que davezu estimula a la creación y al compromisu con tolo que s’echa en falta. Son dellos los exemplos de proyectos de música asturiana que crearon xente emigrao y estos díes hai material nuevu d’ún d’ellos, LaGuinda. «Morenina» ye’l cantar y videu en directo que ta acabante d’asoleyar esta banda lliderada por Ana Pereda, tamién componente de Filanda, que lleva siete años emigrada en Francia. Música balcánica, ritmos llatinos y d’otres partes del mundu únense nesta composición que tien una lletra n’asturianu que reivindica la función social, cultural, de diversión y de seducción del baille tradicional.

«Cuando llegué a Francia vi qu’equí los bailles tradicionales nun se perdieran tanto como n’Asturies y entós agora ver dende lloñe resurdir el baille tradicional n’Asturies enlléname’l corazón d’alegría», desplica Pereda esclariando que «la lletra de «Morenina» naz d’eses ganes de tar n’Asturies, de poder baillar con tola xente que ta deprendiendo; con tola xente que lleva años baillando y deprendiendo a otra xente». Amás, ye un reconocimientu a tolo qu’hai detrás del baille: «esi xuegu de seduccion qu’hai inherente al baille; dir a la romería pa ver quién anda per ehí cerca y cortexar; socializar; facer fiesta; conocer xente nuevo…», desplica la cabezalera de LaGuinda afirmando qu’entamó va cinco años a baillar asturiano y qu’aprovecha cada visita a casa pa poder ponelo en práctica.

Y ye que «Morenina» ye una pieza que convida a baillar ritmos estremaos nel so desarrollu. «La música nació cuando entamé a tocar el acordión va un añu y mediu», comenta esta multiinstrumentista avilesina que toca’l «pianu, guitarra, ukelele, charango, percusiones, cantu y acordión». Foi con esti últimu instrumentu col qu’aportó a la música balcánica -«que tien un repertoriu preciosu pal acordión»-, el son predominante d’esti tema ensin escacer otros como los llatinos o mediterráneos. Precisamete LaGuinda naz de toles influencies qu’Ana Pereda topó en Lyon, la ciudá na que vive, na qu’hai «muncha música tradicional de tolos llaos del mundu». De tou esi descubrimientu sonoru, estudiu, respetu y trabayu con xente de distintos llugares naz LaGuinda.

«»Morenina» surde d’eses ganes de tar n’Asturies y de querer baillar asturiano. Amás, ye un reconocimientu a tolo qu’hai detrás del baille: a esi xuegu de seducción qu’hai inherente al baille; dir a la romería; socializar; facer fiesta; conocer xente nuevo…»

Francia o Asturies

«Fai dalgunos años que tengo ganes de volver a Asturies, pero la condición de la profesión par ser música nun tien nada que ver en Francia que n’Asturies. Francia ye un país mui potente, porque se pue vivir colos proyectos de música: hai bastantes ayudes del Estáu que te consideren música y pues vivir de conciertos ensin tener que ser Beyoncé», llamenta Ana Pereda, que lleva siete años en Lyon, onde ye profesora nel conservatoriu y onde toca en distintos proyectos como un grupu de música cubana, onde ye cantante y percusionista, o otru col que xiró de música maloya, un son orixinariu de la isla de la Reunión, cerca de Madagascar.

«Frustación» ye la pallabra qu’usa pa definir la so situación. Esclaria que ta mui «agradecía» de tolo que tien en Francia pero que tamién tien «munches ganes de volver», daqué que-y plantega interrogantes: «ver qué voi poder facer cuando vuelva n’Asturies pa poder comer y poder vivir». Por eso esta música tresforma la señaldá en creativá con LaGuinda: «ye una bocanada d’aire fresco poder cantar n’asturianu y compartir equí esos cantares d’ellí; ye como una manera de tar cerquina de la tierra». Amás desplica que, como «falante d’amestáu, francés y castellanu», cuando escribe n’asturianu présta-y «buscar pallabres que puedan tener una sonoridá guapa pa la música y asina conectar con esa parte de valorar l’asturianu, estudialo, deprendelu y dedica-y tiempu».

«La idea ye volver p’Asturies nel branu de 2025 y facer una xira pa por fin poder amosar a mio familia, amigues y a la xente d’ellí lo que tamos faciendo LaGuinda»

Xira n’Asturies

«Llevamos yá tiempu trabayando sobre cantares tradicionales asturianos; axeitándolos a la nuestra manera; axuntándolos a otros ritmos y a instrumentos de distintos países», desplica la multiinstrumentista. Comenta qu’agora mesmo tán trabayando n’otru cantar entituláu «Pandeiru«, col qu’introducen la pandereta, instrumentu que tamién hai «na tradición occitana, francesa, italiana…». Reconoz que ta mui contenta cola banda que formó; qu’aprecien la música asturiana; qu’ellí «la xente nun sabe ni onde ta Asturies, entós flipen cola música»; y que tán tocando muncho per Francia, porque l’oxetivu de LaGuinda ye’l directu.

«La idea ye volver p’Asturies nel branu de 2025 y facer una xira pa por fin poder amosar a mio familia, amigues y a la xente d’ellí lo que tamos faciendo LaGuinda». Por eso Ana Pereda comenta que, en cuenta de trabayar nun discu, tán «nun procesu de grabar directos y de diseñar un show prestosu, divertíu, dinámicu y que faiga baillar a la xente». D’esta manera, quiciabes, pal añu qu’entra van poder sentise n’Asturies tola música estremao qu’esta artista lleva bien d’años guardando na so maleta y entemeciéndola ensin perder enxamás el so raigañu.