Melandru publica l’adelantu del so segundu trabayu

Yá ta en toles plataformes musicales “Shinji sube al EVA”, el cantar adelantu del segundu EP de Melandru. Esti tema ye un homenaxe a Neon Genesis Evangelion, un anime cyberpunk del que dellos miembros d’esta formación post-rock considérense fans. En pallabres del grupu, la pieza «amuesa un claru xiru estilísticu, con influencies de la electrónica, el shoegaze o’l dream pop, con textures denses y cambiantes que deriven nun climax final». Pa sentir más temes va haber qu’esperar al 12 d’abril, fecha na que van asoleyar los cinco temes del EP entituláu II.

«“Shinji sube al EVA” tien clares referencies a la trama d’esti anime y la lletra trata dalgunos de los temes trataos nesta serie como son la ansiedá, el determinismu social y el mieu a afrontar conflictos», despliquen Melandru sobre esti llanzamientu nuevu qu’asoleya dempués de cuasi seis años silenciu, Con esti tema, la formación maliaya sigue dando pasos nel so camín únicu dientro de la música asturiana, caracterizáu pol so soníu envolvente, delles veces raspiando lo escuro, y nel que destaca l’emplegu de la gaita tradicional, que-y aporta personalidá y un toque orixinal, más cuando apaez nun contestu ayenu dafechu a lo tradi.

II va presentase en directo’l 25 de mayu nel Teatru Riera de Villaviciosa, nun conciertu nel que van poder sentise los cinco temes que formen el trabayu -cuatro inéditos y ún que la banda lleva tiempu interpretando nes sos actuaciones-, amás de dalgunes de les pieces que formaron el primer trabayu de Melandru, asoleyáu en 2018.

Merca’l primer discu de Melandru

Dexa un comentariu

X